Psalmus 49

Psalmus 49 (enumeratione Graeca psalmus 48 dictus) libri Psalmorum verbis "Audite haec, omnes" incipit; etiam habet superscriptionem: "Magistro chori. Filiorum Core. PSALMUS" (sic in Nova Vulgata). In hoc psalmo stultitia divitiis confidendi tractatur.^[1]

Ioannes Calvinus, theologiae Reformationis fautor, sic argumentum psalmi descripsit:

Quia ut plurimum contingit impios homines, vel terrenis deliciis addictos, prospere et foeliciter agere, veros autem Dei cultores vel rebus adversis premi, vel sub miseriis suis languere: ne priores nimis in sua fortuna superbiant, alii vero despondeant animos, docet Propheta, quanvis bonis omnibus pro voto affluant profani homines, quandiu a Deo alieni sunt, umbratilem foelicitatem in qua sibi placent, quae instar somni evanescit, minime expetendam esse. Bonos autem, quanvis contumeliose tractentur, vel affligantur multis malis, respici tamen a Deo, ut tandem ipsos liberet.^[2]

Verba psalmi

Haec sunt verba psalmi 49 (48) ex versione vulgata Clementina:

¹ In finem, filiis Core. Psalmus.
² Audite haec, omnes gentes;
auribus percipite, omnes qui habitatis orbem:
³ quique terrigenae et filii hominum,
simul in unum dives et pauper.
⁴ Os meum loquetur sapientiam,
et meditatio cordis mei prudentiam.
⁵ Inclinabo in parabolam aurem meam;
aperiam in psalterio propositionem meam.
⁶ Cur timebo in die mala?
iniquitas calcanei mei circumdabit me.
⁷ Qui confidunt in virtute sua,
et in multitudine divitiarum suarum, gloriantur.
⁸ Frater non redimit, redimet homo:
non dabit Deo placationem suam,
⁹ et pretium redemptionis animae suae.
Et laborabit in aeternum;
¹⁰ et vivet adhuc in finem.
¹¹ Non videbit interitum,
cum viderit sapientes morientes:
simul insipiens et stultus peribunt.
Et relinquent alienis divitias suas,
¹² et sepulchra eorum domus illorum in aeternum;
tabernacula eorum in progenie et progenie:
vocaverunt nomina sua in terris suis.
¹³ Et homo, cum in honore esset, non intellexit.
Comparatus est iumentis insipientibus,
et similis factus est illis.
¹⁴ Haec via illorum scandalum ipsis;
et postea in ore suo complacebunt.
¹⁵ Sicut oves in inferno positi sunt:
mors depascet eos.
Et dominabuntur eorum iusti in matutino;
et auxilium eorum veterascet in inferno a gloria eorum.
¹⁶ Verumtamen Deus redimet animam meam de manu inferi,
cum acceperit me.
¹⁷ Ne timueris cum dives factus fuerit homo,
et cum multiplicata fuerit gloria domus eius:
¹⁸ quoniam, cum interierit, non sumet omnia,
neque descendet cum eo gloria eius.
¹⁹ Quia anima eius in vita ipsius benedicetur;
confitebitur tibi cum benefeceris ei.
²⁰ Introibit usque in progenies patrum suorum;
et usque in aeternum non videbit lumen.
²¹ Homo, cum in honore esset, non intellexit.
Comparatus est iumentis insipientibus,
et similis factus est illis.

Notae

↑ "The Folly of Trust in Riches", titulus in New Revised Standard Version apud BibleGateway.
↑ In librum Psalmorum, Iohannis Calvini commentarius (Oliva Roberti Stephani, 1557), argumentum Psalmi 49, p. 229.

Nexus externi

Vicimedia Communia plura habent quae ad Psalmum 49 spectant.

Psalmus 48 in versione Vulgata Stuttgartensi (iuxta Hebraicum)
Psalmus 48 in Vulgata Clementina (versione Gallicana)
Psalmus 49 in Nova Vulgata
Psalmus 49 cum commentario Rashi (Hebraice, Anglice)

Liber Psalmorum — תהילים

Psalmi Bibliorum Hebraicorum	1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66 • 67 • 68 • 69 • 70 • 71 • 72 • 73 • 74 • 75 • 76 • 77 • 78 • 79 • 80 • 81 • 82 • 83 • 84 • 85 • 86 • 87 • 88 • 89 • 90 • 91 • 92 • 93 • 94 • 95 • 96 • 97 • 98 • 99 • 100 • 101 • 102 • 103 • 104 • 105 • 106 • 107 • 108 • 109 • 110 • 111 • 112 • 113 • 114 • 115 • 116 • 117 • 118 • 119 • 120 • 121 • 122 • 123 • 124 • 125 • 126 • 127 • 128 • 129 • 130 • 131 • 132 • 133 • 134 • 135 • 136 • 137 • 138 • 139 • 140 • 141 • 142 • 143 • 144 • 145 • 146 • 147 • 148 • 149 • 150
Apocrypha vel Deuterocanonica	151 • 152–155 • Psalmi Salomonis
Vocabula	Psalterium • Hallel • Alleluia • Psalmi paenitentiales • Selah • Canticum ascensionum
Versiones in Vicifonte	Tehilim (Hebraice) • Septuaginta (Graece) • Vulgata (Latine)

[1] "The Folly of Trust in Riches", titulus in New Revised Standard Version apud BibleGateway.

[2] In librum Psalmorum, Iohannis Calvini commentarius (Oliva Roberti Stephani, 1557), argumentum Psalmi 49, p. 229.

[1]

[2]