Urbs Sancti Ioannis de Portu Divite

Urbs Sancti Ioannis de Portu Divite^[1] seu Portoricensis,^[2] urbs capitalis et frequentissimum territorii Portus Divitis municipium, ad oram borealem insulae Portus Divitis stat, litoribus illius portús circumdata quem nomina urbis omnisque insulae commemorant. Anno 2010, homines 395 326 intra limites municipii Sancti Ioannis habitabant. Urbs a colonis Hispanis anno 1521 condita est. Caput fuit gubernii insularis tam sub Hispaniae quam post annum 1898 sub Civitatum Foederatarum ditione.

Aedificia historica in urbe exstant, quorum inter notabilissima sunt bina fortalitia ad bellum defendendum, castella Sancti Philippi Murri et Sancti Christophori, ac veterrima sedes publica in America continenter adhibita.

Historia

Ruinae domicilii Ioannis Juan Ponce de León ad Caparram.

Tabula urbis et portus anno 1766 facta

La Plaza circa 1900.

Architectura Sancti Ioannis Veteris.

Nonnullis viis Sancti Ioannis Veteris sunt cobblestones ex aevo colonico Hispanico.

Vestigia primae coloniae Hispanicae, nomine Caparrae, iussu Ioannis Pontii Legionensis anno 1509 Guaynabi in pago positae, in suburbiis urbis Sancti Ioannis visitantur. Unde suadente Roderico de Figueroa regis legato, nolente Ioanne Pontio, anno 1521 coloni ad insulam prope iacentem, quae "portum divitem" protegit, remoti sunt^[3] ibique "urbem Portus Divitis" vel ciudad del Puerto Rico condiderunt. Quae insula Sancti Ioannis hodie media urbe stat regionemque urbanam antiquissimam constituit. Ecclesia Sancti Ioannis Baptistae in urbe anno 1521 e trabibus erecta, ab anno 1540 lapidibus refecta est.

Urbs anno 1595 a Francisco Drako Anglo destructa, anno 1597 a Georgio Clifford capta sed statim propter morbum relicta, anno 1797 a Radulpho Abercromby vano obsessa est. Mensibus Maio et Iunio 1898 classis Civitatum Foederatarum duce Gulielmo Sampson portum navesque Hispanicas ibi morantes impugnavit.

Cultura

Universitas Portoricensis publica, omnis consortionis maxima, anno 1903 in urbe condita est.

Ecclesia cathedralis Sancti Ioannis Baptistae sedes fuit dioecesis Portoricensis, quae ab anno 1960 in archidioecesim elevata est.

Populus

Censu Civitatum Foederatarum anni 2010 homines 395 326 in municipio S. Ioannis habitabant, e quibus 181 632 (46 per centum) mares, 213 694 (54%) feminae; 319 875 (81%) annos 17 vel plures nati; 335 687 (85%) se in ipsa Portus Divitis insula, 52 499 (13%) in aliis Americae Latinae regionibus, 7 140 (2%) alicubi natos confitentes; 268 708 (68%) se albicolores, 73 538 (19%) nigricolores esse referentes. Foci omnino 165 316, familiae 100 923 erant, quarum 51 191 binis maritis, 41 148 muliere sola, etiam 48 041 filiis eiusdem familiae praesentibus.^[4]

Gubernium

Urbs S. Ioannis caput est insulae Portus Divitis e qua territorium obnoxium Civitatum Foederatarum constituitur. Inter veterrimas capitales ab Europaeis in America conditas locum secundum tenet (post Dominocopolim rei publicae Dominicanae).

Media urbs suburbiumque australe municipium Sancti Ioannis constituunt. Suburbia occidentalia inter municipiis Toa Baja, Bayamón, Cataño, Guayabo, orientalia inter Trujillo Alto et Carolina dividuntur.

Notae

↑ "Episcopatus ... S. Ioannis de Portu divite" (vide p. 54 apud Google Books).
↑ Confer "Archidioecesis Sancti Joannis Portoricensis" e The Hierarchy of the Catholic Church (situs a Davide M. Cheney elaboratus) (Anglice).
↑ Pabón-Charneco (2017) pp. 8-10.
↑ "U.S. Census Bureau Delivers Puerto Rico's 2010 Census Population Totals, Including First Look at Race and Hispanic Origin Data for Legislative Redistricting" (24 Martii 2011) apud tabularium Census Civitatum Foederatarum; tabula apud FactFinder sub nomine "San Juan Municipio, Puerto Rico" reperta

Bibliographia

Topographica

"Porto Rico; San Juan Bautista de Puerto Rico" in K. Baedeker, ed., United States, with Excursions to Mexico, Cuba, Porto Rico, and Alaska (4a ed. Lipsiae: Baedeker, 1909) pp. 669-670
"San Juan" in Encyclopaedia Britannica. 11a ed. (Sicagi, 1911) html djvu
"San Juan" in Puerto Rico: a Guide to the Island of Boriquén, compiled and written by the Puerto Rico Reconstruction Administration (Novi Eboraci: University Society, 1940) pp. 171–232

Historica

Hostos, Adolfo. 1948. Historia de San Juan, ciudad murada, 1521–1898. Sancti Ioannis in urbe.
J. W. Joseph, Stephen C. Bryne, "Socio-Economics and Trade in Viejo San Juan, Puerto Rico: Observations from the Ballaja Archaeological Project" in Historical Archaeology vol. 26 (1992) pp. 45-58 JSTOR.
Félix V. Matos Rodríguez, Women and urban change in San Juan, Puerto Rico, 1820–1868. Gainesville: University Press of Florida, 1999. ISBN 0813016762.
Arleen Pabón-Charneco, The Architecture of San Juan de Puerto Rico: Five Centuries of Urban and Architectural Experimentation. Novi Eboraci: Routledge, 2017. ISBN 978-1-317-42358-4 (Paginae selectae apud Google Books).
José Seguinot Barbosa, "Geografía histórica de la Ciudad de San Juan, Puerto Rico" in Boletín de la Real Sociedad Geográfica vol. 128 (1992) pp. 199-216.
R. A. Van Middeldyk 1903. The History of Puerto Rico from the Spanish Discovery to the American Occupation.

De urbe hodierna

Silvia Álvarez Curbelo, Aníbal Sepúlveda-Rivera, De vuelta a la ciudad: San Juan de Puerto Rico 1997–2001. Sancti Ioannis in urbe: Fundación Sila M. Calderón, 2011. ISBN 9780982080603

Nexus interni

Carmen Yulín Cruz Soto, urbi praefecta, hic nata

Nexus externi

Vicimedia Communia plura habent quae ad urbem Sancti Ioannis spectant.

Situs geographici et historici: Locus: 18°27′55″N 66°7′0″W • OpenStreetMap • GeoNames • Thesaurus Getty • Facebook Places • Store norske Lexikon • "1804544" apud USGS • Большая российская энциклопедия

Situs publicus urbis S. Ioannis (Hispanice, Anglice)
"San Juan Capital City" apud Welcome to Puerto Rico
"Historia" olim apud Vive San Juan divulgata (Hispanice)

[1] "Episcopatus ... S. Ioannis de Portu divite" (vide p. 54 apud Google Books).

[2] Confer "Archidioecesis Sancti Joannis Portoricensis" e The Hierarchy of the Catholic Church (situs a Davide M. Cheney elaboratus) (Anglice).

[3] Pabón-Charneco (2017) pp. 8-10.

[census-4] "U.S. Census Bureau Delivers Puerto Rico's 2010 Census Population Totals, Including First Look at Race and Hispanic Origin Data for Legislative Redistricting" (24 Martii 2011) apud tabularium Census Civitatum Foederatarum; tabula apud FactFinder sub nomine "San Juan Municipio, Puerto Rico" reperta

[1]

[2]

[3]

[4]