Pullina paedagogi principum

Pullina paedagogi principum, Sinice 宫保鸡丁 Gōngbǎo jīdīng, est ferculum saepe in popinis Sinicis oblatum. E gastronomia Sichuanensi oritur ubi ad honorem viceregis Ding Baozhen "Gongbao" ("paedagogi principum") nominatur. Sapor iuris litchioidis agnoscitur, insuper immixtis capsicis adustis et Zanthoxyli fructibus.

Ars coquinaria Sinensis: Ofellae pullinae paedagogi principum (Gongbao jiding) Sciamhaevi in popina Sichuanensi inlatae

Versio Sinarum Thailandensium (nomine Thai Kai phat met mamuang Himaphan ไก่ผัดเม็ดมะม่วงหิมพานต์), ofellis pullinis ex oleo praecoctis, cum anacardiis

Pullus crudus in ofellas dissecatur quae e sale, soia, vino Shaoxingensi, amylo patatarum macerantur. Ius e saccharo, soia, aceto Zhenjiangensi praeparatur. Capsica siccata et zanthoxyli fructus in sartagine Sinensi ex oleo praefriguntur; adduntur ofellae pullinae, deinde allium, gingiber, cepullae candidae. Pullo iam cocto ius cito immiscetur et ultimo arachides sive anacardia adduntur. Ferculum infertur.

Bibliographia

Cibus auferendus Singapurensis: Gongbao jiding, sed offis maioribus cepullisque viridibus

• William Chan Tat Chen, Bin Gao, "La Cuisine chinoise" in Michel Aufray, Michel Perret, edd., Cuisines d'Orient et d'ailleurs (Grenoble: Glénat, 1995. ISBN 2-7234-1792-1) p. 189
• Fuchsia Dunlop, The Food of Sichuan (Londinii: Bloomsbury, 2019) pp. 182, 234