Saratovia

Saratovia,^[1] vulgo Saratov (Russice: Саратов), est urbs Russiae, metropolis regionis Saratoviensis, in ripa dextra Rha fluminis (cuius aequor hic receptaculo aquae Volgogradensi elevatum est) sita. Circa 843 milia incolarum habuit anno 2016.

Saratovia est valens sedes transportationis (portum ad Rha, aeroportum, et stationem ferriviarum habens), industriae (constructionis machinarum, etc.), et culturae. Ibi sunt nonnullae universitates (quarum prima condita est anno 1909) aliaque instituta educationis, musea, et theatra.

Historia

Saratovia, anno 1590 in ripa dextra Rha fluvii ut fortalitium condita, hieme annorum fortasse 1613 et 1614 exusta est, ad annum 1617 in ripa sinistra Rha fluminis reconstructa, anno 1674 enim, secundum decretum tzaris Alexii, in loco novo in ripa dextra Rha denuo constructa est. Anno 1708 copiis rebellatorum a Condratio Bulavin ductorum oppugnabatur. Sedes administrativa districtus in gubernio Casanensi (annis ab 1708 ad 1717 et ab 1728 ad 1732) et in gubernio Astrachanensi (annis ab 1717 ad 1728 et ab 1732 ad 1780), ab anno 1769 enim provinciae Saratoviensis gubernii Astrachanensis et ab anno 1780 praefecturae Saratoviensis Imperii Russici metropolis fuit. Praefectura illa anno 1796 abolita, Saratovia tamen ab anno sequenti ad annum 1928 caput gubernii Saratoviensis erat. Deinde urbs sedes administrativa regionis et territorii Rha (Volgae) Inferioris, ad annum 1932, postquam territiorii et anno 1936 regionis hodiernae Saratoviensis facta est.

Incolae noti

Nicolaus Černyševskij, philosophus et scriptor rerum novarum cupidus.
Georgius Davidov, esperantista, cuius bibliotheca maxima Esperantica usque annum 1917 Saratoviae fuit.
Nicolaus Kostomarov, historicus.
Nicolaus Semënov, physicus et chemicus.
Helgus Tabakov, actor et moderator theatricus et cinematographicus.
Nicolaus Vavilov, biologus.

Notae

↑ Eduardi Eversmann Fauna lepidopterologica Volga-Uralensis, p. 371; Ioannis Reinholdi Forster Specimen Historiae Naturalis Volgensis; Dictionnaire françois-espagnol, et espagnol-françois, tom. 2, p. 745.

Nexus externi

Vicimedia Communia plura habent quae ad Saratoviam spectant.

Situs geographici et historici: Locus: 51°32′0″N 46°0′0″E • GeoNames • Store norske Lexikon • Большая российская энциклопедия

Pagina de Saratovia Encyclopaediae Russicae Magnae (Russice)

[1] Eduardi Eversmann Fauna lepidopterologica Volga-Uralensis, p. 371; Ioannis Reinholdi Forster Specimen Historiae Naturalis Volgensis; Dictionnaire françois-espagnol, et espagnol-françois, tom. 2, p. 745.

[1]