Constantia (Romania)

Vide etiam paginam discretivam: Constantia.

Constantia (Dacoromanice Constanța), vel nomine classico Tomis, est urbs Romaniae circiter 310 471 incolarum (anno 2002) et caput districtus eiusdem nominis.

Constantia (Tomis)

Situs urbis Constantiae

Historia.

Tomis^[1] (Graece Τόμοι), colonia a Milesiis deducta, saeculo septimo vel sexto a.C.n. condita est in laevo Ponti Euxini litore prope ostium Istri, quae regio a Getis tunc incolebatur. Ita urbs Geto-Graeca fuit, antequam, primo saeculo a.C.n., in Romanam dicionem redigeretur. In provinciam Moesiam tum inclusa est.

Nobilis in primis erat ob exsilium poetae Ovidii qui extremam vitam ibi egit ab anno 9 (mortuus est anno 17 vel 18). Miserrimus poeta multum de frigore ac de incursibus barbarorum trans Istrum in elegiis questus est. Popularem etymologiam de nomine huius urbis nobis tradidit, a verbo Graeco τεμειν (id est secando) ductam, tamquam Medea cum Iasone patrem Aeetam fugiens, huc appulisset atque fratrem Absyrtum necavisset et membra eius hoc animo secuisset ac dispersisset, ut persequentes tardaret, dum membra miseri pueri lugens pater colligit atque sepelit. Haec etymologia verisimilis quidem non est, sed cum maesto animo exulis poetae optime congruit.

Postea urbs eadem Constantia vocata est in honorem Constantiae, sororis Constantini imperatoris, qui Constantinopoli nomen suum dedit. Anno 441 Hunni urbem expugnaverunt. Parva urbs sine vi medio aevo fuit.