Sandra Hüller
Sandra Hüller est actrix scaenica Germanica anno 1978 nata, quae in Germania et Helvetia partes theatrales agit. Etiam in pelliculis Europaeis prodit. Anno 2003 ab ephemeride Theater heute "actrix iuvenis anni" (Nachwuchsschauspielerin des Jahres) nominata est. Inde ab eo anno multa pretia aliaque ornamenta artis sumpsit. Hüller praesertim pellicula The Zone of Interest ab Ionatha Glazer anno 2023 disposita innotuit. Eodem anno prodiit in Anatomie d'une chute, pellicula Francica ab Iustina Triet facta, qua cum alia tum candidatum praemii Oscar meruit.
.jpg)
De cursu vitae
recensereSandra Hüller Sulae in Thuringia, quae tum pars DDR erat, nata est die 30 Aprilis anno 1978 et in oppido Friedrichroda adolevit. Parentes Sandrae educatores sunt, nam pater in sede apprenticiorum (id est: opificii discipulorum) docebat, et mater post scholam tutelam praestabat. Exarsa arte histrionia post gymnasium septem et decem annorum Berolinum profecta in academiam histrionalem Hochschule für Schauspielkunst Ernst Busch admissa est.[1]
Adprobata in artis examinatione anno 2000 Hüller primum Ienae in theatro prodiit, deinde annum 2001 actrix hospitalis in Schauspiel Leipzig egit, et usque ad annum 2006 Basileae in Theater Basel versata est.
Hüller tirocinium cinematographicum anno 2006 praestitit in Requiem, pellicula ab Iohanne Christiano Schmid disposita, in qua partes egit feminae, cuius impetus epileptici praesentiam diaboli indicare ac exorcismum violentum poscere intelleguntur. Quo opere in Berlinariis ursum argenteum meruit.
Post primam pelliculam Hüller etiam in scaena operam dare pergit, quamquam in multis quoque pelliculis prodit. Anno 2007 primum invitata est ad Berliner Theatertreffen, quibus feriis deinde aliquotiens interfuit. Ab anno 2012 ad 2015 Hüller membrum theatri Münchner Kammerspiele fuit. Item in multis aliis theatris prodiit. In ephemeride Theater heute praemio actricis scaenicae anni adfecta est 2010, 2013, 2019, 2020.
Celebritatem obtinuit Hüller pellicula Toni Erdmann a Marina Ade anno 2016 disposita, in qua partes consiliatricis ambitiosae agit, quae cum patre sua ad ioca puerilia prono male convenit. Anno 2023 duabus inter gentes innotuit pelliculis, quae sunt (1) Anatomie d'une chute, pellicula criminalis Francica ab Iustina Triet facta, in qua personam agit feminae, quae caedis mariti sui accusatur; et (2) The Zone of Interest ab Ionatha Glazer disposita, in qua partes agit Hedwigae Höss, uxoris Rudolphi Höss, ducis castrorum Auschwitz.
Notae
recensere- ↑ Roxborough 2023.
Bibliographia
recensere- Roxborough, Scott (2023) Sandra Hüller, Actress of the Year? The Hollywood Reporter, 1 Septembris.