De Halonneso
De Halonneso[1] (Graece Περὶ Ἁλοννήσου) est oratio deliberativa (suasoria) anno 342 a.C.n. ab oratore Atheniensi coram populo in ecclesia habita et in corpore Demosthenico tradita. Quia genus dicendi nihil cum Demosthenico commune praebet paene omnes critici moderni Libanium[2] sequuntur qui ex variis indiciis hanc orationem Hegesippo reddebat[3], oratori coaevo atque eiusdem factionis quam Demosthenes. Antiqui non ita consentanei erant nec Dionysius Halicarnasseus[4] dubitabat quin haec oratio genuina fuerit. Causa fuisse videtur quod et ipse Demosthenes orationem de insula Halonneso habuit[5] quae non superest.
De argumento recensere
Orator epistulae Philippi respondet, quocirca de variis rebus per successionem disputatː de pace Philocratis emendanda, de rebus in Thracia et in Chersoneso gestis, de commercii iure, de Pythonis legatione, de captivis, de iniuriis a colonis Atheniensibus Potidaeae acceptis... Parva pars (2-8) initio ad insulam Halonnesum spectat quae Atheniensium fuerat et cum piratae eam cepissent atque Philippus eos expulisset suam esse rex nunc dicebat. Nihilomnus eam Atheniensibus dare non recusabat. Hegesippus Athenienses hortabatur ne hoc donum a Philippo acciperent sed redditionem ab eo exigerent insulae quae iure ad imperium maritimum Atheniense pertinebat[6]. Hoc idem argumentum Demosthenes quoque explicarat siquidem Aeschini credimus (Contra Ctesiphontem 83)[7].
Notae recensere
- ↑ Numerus 7 in corpore Demosthenico
- ↑ In argumento orationis.
- ↑ Ioannes Theodorus Voemelius, Ostenditur Hegesippi esse orationem de Halonneso, Francofurti, 1830
- ↑ De Demosthenis eloquentia 13 et Epistula ad Ammaeum I.
- ↑ Aeschines, Contra Ctesiphontem 83. Cf. Athenaeus, Deipnosopistae VI.3.
- ↑ Philippi epistula 12-15.
- ↑ Vide etiam Plutarchus, Demosthenes 16.
Editiones et commentarii recensere
- Loeb classical library online.
- Collection des Universités de Franceː Maurice Croiset, Harangues. Tome II, Les Belles Lettres, 1925
- Commentarius Latinusː Hegesippi oratio de Halonneso : secundum codd. mscr. recognita. Prolegomenis annotatione critica et commentariis illustrata ab Ioanne Theodoro Voemelio, Francofurti, 1833
Plura legere si cupis recensere
- Paul Cloché, La politique étrangère d'Athènes de 404 à 338 avant Jésus-Christ, Lutetiae, Félix Alcan, 1934 Recensio critica Auctoris responsum Altera recensio critica
- Hieronymus Vitelli, In Hegesippi oratione de Halonneso codicum Florentinorum lectionis discrepantiam, Florentiae, 1876