Vladimirus Komarov (botanista)

Vladimirus Leontii filius Komarov (Russice Владимир Леонтьевич Комаров, tr. Vladimir Leont'evič Komarov; Petropoli natus die 1 Octobris^[1] 1869, Moscuae mortuus die 5 Decembris 1945) fuit botanista et geographus Russicus et Sovieticus, alumnus et (ab anno 1918) professor Universitatis Petropolitanae, socius correspondens (ab anno 1914) Academiae Scientiarum Petropolitanae, socius ordinarius (ab anno 1920) Academiae Scientiarum Russicae, vicarius praesidis (ab anno 1930) et dein (ab anno 1936) praeses Academiae Scientiarum URSS. Expeditionum scientificarum in Asiam Mediam (annis 1892–1893), Orientem Extremum, Mandshuriam, Coream (annis 1895–1897), Saianos occidentales (anno 1902), Camtschatcam (annis 1908–1909) et in provinciam Austro-Ussuriensem (anno 1913) particeps, herbaria magna collexit. Opera sua principalia de taxonomia et geographia plantarum atque se studio florae scripsit. Pro operibus suis bis (annis 1941) et 1942) Praemio Staliniano atque ter (annis 1939, 1944, 1945) insigne ordinis Leniniani ornatus, anno 1944 etiam titulo Herois Laboris Socialistici dignatus est. Komarovia, genus Apiacearum, nonnullaque alia taxa, Institutum Botanicum Komarovianum, oppidum Komarovo Petropoli nonnullaque alia obiecta in eius honorem vocantur.