Ungersheim

Ungersheim (Latine nonnumquam Ungershemium, saepius Ungersheim) est commune Francicum 2'432 incolarum (anno 2021) praefecturae Rheni Superioris et ab anno 2021 Communitatis Europaeae Alsatiae in regione orientali olim Alsatia et a die 1 Ianuarii 2016 Alsatia Campania Arduenna et Lotharingia et nunc ex plebiscito Grand Est vocata.

Hodie vicus praecipue ob Écomusée d’Alsace^[1] anno 1984 inauguratum sed iam decennio antea inchoatum notus estː in hoc apertum Museum domus veteres Alsatiae insignes (vetustissimae e quindecimo saeculo) translatae sunt et artifices ut olim in tabernis artificiis variis operam dant (faber, figulus, lignarius, coriarius, textor, molitor etc.). Ita veterem Alsaticorum vivendi rationem conspicere licet.

Historia

Vicus a Suecis anno 1634 deletus est, multi incolae in Helvetiam confugerunt. Post viginti quinque annos tantummodo redire coeperunt et parochialis vita paulatim restituebatur. In regesto baptismali parochus Ioannes Michaelis Würtzlin postquam narravit quomodo praecessor iam anno 1632 fugisset atque Mulhusiae, in civitate reformata, interierit ita scribebatː "Anno 1634 a Suecis militibus conflagrata et in cineres redacta est domus parochialis hic in Ungersheim... usque ad annum 1662 in quo anno domus parochialis denuo funditus constructa est"^[2]. Interim communis vicini Feldkirch parochi ministerium spiritualem incolis reliquis, ut poterant, ministrabant.