Itys

Itys^[1] in mythologia Graeca fuit miserrimus filius Terei, Thracum regis, et Procnae Atheniensium regis Pandionis filiae. Nam ab ipsa matre caesus et aeneo magno concoctus ut epulum quoddam sacrum ignaro patri adpositus est. Huius horrendi facinoris causa fuit quod Tereus Procnae sororem Philomelam vi stupraverat atque ne rem divulgare posset eius linguam secuerat atque remotis stabulis occulte custodierat. Simul mortuam esse omnibus dictitans per mendacium lugebat eam. Re cognita Procne hanc atrocem ultionem excogitavit atque peregit.

*Cena Terei* a Petro Paulo Rubens picta; Procne marito suo caput Ityis praebet.

Quam infaustis ominibus natus esset Itys talibus versibus declarabat poeta Ovidius ː

Eumenides stravere torum, tectoque profanus

incubuit bubo thalamique in culmine sedit.

hac ave coniuncti Procne Tereusque, parentes

hac ave sunt facti

Notae

↑ Sic plerique auctores. At Ἴτυλος in loco interpolato Odysseae appellatur (XIX.522) ubi filius Zethi dicitur. Cf Catullus 65.14ː Daulias absumpti fata gemens Itylei

Fontes

Aeschylus, Agamemnon1142-5
Apollodori bibliotheca III.14.8
Aristophanes, Aves 210-4.
Hyginus mythographus, Fabula 45
Odyssea XIX.522-523
Ovidius, libro sexto Metamorphoseon, 424sqq.
Pausanias libro primo Graeciae descriptionis V.4 et XXIV.3 et XLI.8-9
Seneca, Agamemnon 670-2
Sophocles, Electra 147-9
Thucydides, libro secundo De bello Peloponnesiaco 29.3

[1] Sic plerique auctores. At Ἴτυλος in loco interpolato Odysseae appellatur (XIX.522) ubi filius Zethi dicitur. Cf Catullus 65.14ː Daulias absumpti fata gemens Itylei

[1]