Wolfgangus Kieling

Wolfgangus Kieling (1924–1985) fuit scaenicus Germanus, qui iam annis 1930 histrio puerilis innotuit posteaque receptus est in cohortem histrionum spectatissimorum. Kieling ab annis 1950 usque ad annum quo mortuus est suam navavit operam.

Wolfgangus Kieling cum Annetta filia anno 1968.

De vita et operibus

Wolfgangus Kieling Berolini (distinctius: Novae Coloniae) natus est die 16 Martii anno 1924. Puer bona indole vocis praeditus anno 1932 partes radiophonicas suae aetati aptas agere coepit, sicut "Lupulum" (Wölfchen) et alias fabellas pueriles.

Post secundum bellum mundanum, quo vulneratus erat, alternatim in Occidentali et Orientali Germania opere occupatus erat. Itaque anno 1954 una cum Gisela Uhlen coniuge secunda Berolinum Orientale profectus in aliquot pelliculis, sicut Genesung (fere 'recuperatio sanitatis'), primas partes egit. Deinde anno 1957 Berolinum Occidentale reversus, factoque cum Gisela divortio, praecipue scaenico et televisifico labori studebat. Custodem publicum anno 1964 imitatus est in pellicula Polizeirevier Davidswache, qua Kieling praemio pelliculae Germanicae laudatus est.

Anno 1966 partes notissimas egit in Torn Curtain, pellicula bello frigido ab Alfredo Hitchcock disposita 66. Nam personam Hermanni Gromek gloriosi custodis Stasi memorabiliter egit in actu, quo Hitchcock, quam difficile sit exanimare hominem, se demonstrare voluisse dixit.

Anno 1968 Kieling, quippe qui bello Vietnamiensi magna voce adversaretur et rationi politicae eius temporis Germaniae Occidentalis quam maxime resisteret, in Germania Orientali rursus consedit, et ibi in aliquibus pelliculis, sicut Das siebente Jahr ('annus septimus'), prodiit.

Kieling translationem vocalem (sive dubbing), quam ab initio curriculi exercuerat, numquam destitit. Nam etiam multos histriones Ruscisilvanos, sicut Franciscum Sinatra et Paulum Newman, voce imitatus est.

Postea praecipue in seriebus televisificis prodiit, paucis exceptis pelliculis maioribus, sicut anno 1984 Abwärts ('deorsum'). Kieling oculorum morbo laborabat, quam ob rem operationes chirurgicas pati debebat. Cancre implicatus Hamburgi die 7 Octobris anno 1985 mortuus est.

Bibliographia

• Bock, Hans-Michael & Tim Bergfelder (ed. 2009) The Concise Cinegraph: Encyclopaedia of German Cinema. Berghahn Books.
• Habel, Frank-Burkhard (2000) Das große Lexikon der DEFA-Spielfilme. Schwarzkopf & Schwarzkopf.
• Kurlansky, Mark (2005) 1968: The year that rocked the world. Vintage.
• Weißbach, Thomas (2011) Schwerer Weg, Übersiedlung aus der Bundesrepublik Deutschland und West-Berlin in die DDR 1961–1989. Verlag Dr. Kovac.

Nexus externi

Vicimedia Communia plura habent quae ad Wolfgangum Kieling spectant.

• Kieling apud IMDb
• multa scitu digna apud Filmportal
• Opera ab hoc homine vel de eo scripta apud Bibliothecam Nationalem Germanicam (Theodisce)
• Ines Walk: vita in paginis Operis fundati DEFA-Stiftung