Alfredus Zinnemann

Alfredus "Fred" Zinnemann (1907-1997) fuit moderator cinematographicus Austriaco-Americanus, qui anno 1929 in Civitates Foederatas Americae inmigravit. Annis 1930 pelliculas breves confecit. Annis 1940 Ruscisilvam transgressus pelliculis mediocriter innotuit. Tandem High Noon (1952) et From Here to Eternity (1953) magnum successum habuerunt. Inter novissimas pelliculas notissimae sunt The Day of the Jackal (1972) et Julia (1977). Zinnemann nulli certo artis generi favit.

De vita et operibus

Alfred Zinnemann die 29 Aprilis anno 1907 Resoviae in Imperio Austro-Hungarico natus est ex gente Iudaea, Anna matre et Anschario patre, medico.^[1] Adolevit in regione Vindobonae tertia, posteaque familiaris fuit Samueli "Billy" Wilder futuro cinematographo Ruscisilvano, cum quo per totam vitam cohaesit. Zinnemann anno 1925 maturitatis facto examine iuris disciplinae studere coepit, quamquam initio musicae disciplinae studio tenebatur.

Anno 1927, invitis parentibus et propinquis, Lutetiae in tractandis cinematographicis machinis se exercuit in Ecole Technique de Photographie et de Cinématographie. Ab anno 1928 Berolini versabatur, proximoque anno adiutor laboravit in pellicula voce carenti cum Marlene Dietrich.

Zinnemann mense Octobri 1929 Ruscisilvam transiit. Ibi moderator adiutor et brevium pellicularum dispositor fuit. Partes minimas in All Quiet on the Western Front egit, sed nullum curriculum histrionis adsecutus est. Zinnemann initio adiutor factus est Bertholdi Viertel, per quem Robertum J. Flaherty, pellicularum documentariarum dispositorem, cognovit. Hinc occasionem nactus est ad primam disponendam (cum Aemilio Gómez Muriel) pelliculam semidocumentariam Redes ('retia'), qua de quaestu piscatorum Mexicanorum narratur.

Zinnemann in civitatem Americanam adscitus est anno 1936. Anno proximo apud Metro-Goldwyn-Mayer (MGM) laborare coepit, et anno 1938 primum praemium Oscar accepit tertio brevi pellicula That Mothers Might Live (1938), qua de Ignatio Semmelweis medico Hungarico narrat. Annis 1940 post primos successus Zinnemann pellicula The Search anno 1948 duobus praemiis Oscar ornatus est. Apud MGM usque ad 1948 laboravit. Deinde cum variis officinis cinematographicis Americanis conlaboravit.

Anno 1951 pelliculam fecit fortasse notissimam, High Noon, qua anno 1953 quattuor praemia Oscar adsecutus est. Eodem anno praemio optimi dispositoris a criticis cinematographicis Neoeboracensibus dato adfectus est.

Zinnemann particulam tantum curriculi sui sex fere decadum Ruscisilvae egit. Nihilo minus per ea tempora effecit, ut luces Ruscisilvanae posteriores, sicut Montgomery Clift, Marlon Brando, Gratia Kelly, Rod Steiger et Meryl Streep, prima tirocinia in pelliculis suis facerent.

Zinnemann infarctu cordis mortuus est Londinii anno 1997.

Notae

↑ Hillstrom 1997: 1116-1119.

Bibliographia

Hillstrom, Laurie Collier (1997³) International Dictionary of Films and filmmakers-2: Directors. St. James Press.
Zinnemann, Fred (1992) My Life in the Movies: An Autobiography. Scribner's Sons.

Nexus externi

De hoc homine in Indice Interretiali Pellicularum (Anglice)
Biographia cum imaginibus (Anglice)
Alfredi Zinnemann biographia et operum index apud KinoTV.com (Germanice)

[1] Hillstrom 1997: 1116-1119.

[1]