Sinus Thermaicus

Sinus Thermaicus^[1] vel Sinus Thermaeus^[2] (Graece Θερμαϊκὸς Κόλπος) pars est Aegaei septentrionalis. Inter Chalcidicem paeninsulam et orientale Graeciae continentis litus (id est praefecturas Pieriam, Emathiam, et Larissam cum Olympo) situs est. Nomen a Therma urbe antica derivatur, quae ad sinus litus olim iacebat. In Sinum Thermaicum effunduntur quattuor flumina: Haliacmon, Lydias, Axius, Echedorus.^[3]

Sinus Thermaicus vadosus est. Multis sedimentis a fluminibus in mare translatis non locus altissimus quidem inter Pallene (hodie Cassandra) et Pieriam situs plus quam 200 metra depressus est. Mare prope Thessalonicam et ante ostium Haliacmonis ac Lydias fluminum maxime 30 metra altum est.^[4]

Ab antiquitate, litus valde mutabatur. Pella urbs anno 500 a.C.n. Sinui Thermaico adiacebat.^[5] Sedimentis fluminum boreo-occidentalis sinus pars primo lacuna, postea terra continens facta est. Inde litus inter annum 500 a.C.n. usque ad annum 1960 80 chiliometra praecessit.^[6]

Tempore recentiore mare reverti videtur: ab anno 1960 usque ad annum 1999, litus singulis annis usque ad 10 centimetra redibat. Postquam anno 1969 venti impetu mare intumuit litusque multis cum domibus fluctibus obrutum est, moles aedificata est. Tamen hieme 1979–1980 locus Calochorium inundatus est.^[7]

Notae

↑ Plinius, naturalis historia 4,36 et Mela 2,3,1.
↑ Tacitus, Annales 5,10.
↑ Graece Ἐχείδωρος; Neograece Γαλλικός.
↑ S. Poulos et alii (1994), "Deltaic Progradation in Thermaikos Bay, Northern Greece and Its Socio-Economic Implications," Ocean and Coastal Management 22: 229–47.
↑ Herodotus VII, 123–24.
↑ Stathis C. Stiros (2001), "Subsidence of the Thessaloniki (Northern Greece) Coastal Plain, 1960–1999," Engineering Geology 61: 243–56.
↑ Ibidem.

Bibliographia

Eumorphopulos, Leonidas (1963). Veränderungen des Golfes von Thessaloniki, in: Geographica Helvetica, 18 (1963), 269 ss. (in interrete)

Nexus externi

Vicimedia Communia plura habent quae ad Sinum Thermaicum spectant.

Situs geographici et historici: Locus: 40°25′18″N 22°44′59″E • GeoNames • Pleiades

[1] Plinius, naturalis historia 4,36 et Mela 2,3,1.

[2] Tacitus, Annales 5,10.

[3] Graece Ἐχείδωρος; Neograece Γαλλικός.

[4] S. Poulos et alii (1994), "Deltaic Progradation in Thermaikos Bay, Northern Greece and Its Socio-Economic Implications," Ocean and Coastal Management 22: 229–47.

[5] Herodotus VII, 123–24.

[6] Stathis C. Stiros (2001), "Subsidence of the Thessaloniki (Northern Greece) Coastal Plain, 1960–1999," Engineering Geology 61: 243–56.

[7] Ibidem.

[1]

[2]

[3]

[4]

[5]

[6]

[7]