Sinus Onegensis

Sinus Onegensis^[1] est magnus maris Albi sinus, qui in meridiana maris parte inter Careliam et paeninsulam Onegensem situs est. Inter promunturium Ucthense (Ucht-Navolok) et ostium Kemii fluminis patet. Ora sinus orientalis ora Onegensis, ora meridiana ora Pomorica nuncupatur. Ora Onegensis et orae Pomoricae pars ad regionem Archangelopolitanam pertinent; pars altera ad Careliam rem publicam. Onega et Vygus et Uchta aliaque flumina in sinum effunduntur; in ostio Onegae fluminis Onega urbs et portus sita est. Insulae in sinu innumerae sunt (praecipue insulae skär generis ad litus Pomoricum), quarum notior Kij insula, ubi monasterium Crucis Onegense situm est. Cingulum Ventosum^[2], collium vel montium humiliorum series, ad meridiem a sinu Onegensi situm est.