Iacobus Sponius

Iacobus Sponius (Francice Jacob Spon, natus Lugduni 13 Ianuarii 1647 - mortuus Vibisci in Helvetia 25 decembris 1685) fuit antiquarius et medicus Gallicus qui libros varios de antiquitatibus Graecis et Romanis plerumque Francice, nonnumquam et Latine composuit. Magnam peregrinationem in Graeciam et Asiam Minorem inter 1674 et 1676 suscepit qua antiquitates visebat et delineabat (unus e primis fuit qui archaeologus sensu verbi hodierno dici posset ː magni momenti enim esse ducebat antiquitates in situ visere). At quia ritibus et doctrinae religionis reformatae renuntiare nolebat cum Ludovicus XIV per edictum Fontis Bleaudi mense octobri 1685 promulgatum edictum Namnetense ab Henrico IV reformatis olim concessum rescidit Iacobus Sponius in Helvetiam fugit et ibi vitam finivit.

Vita

Iacobus est filius Caroli Sponii, medici Lugdunensis Graecarum litterarum periti cuius diviti familiae origo Germanica erat. Prima studia Genavae absolvit, cuius urbis postea historiam composuit et ubi tum religionis reformatae placitis imbuebatur. Mox patris vestigiis ingressus medicinae Montepessulani studuit atque 1667 doctor medicus renuntiatus et ipse collegio medicorum Lugdunensium aggregatus est. Qua in urbe ruinis Romanae aetatis redundante studio epigraphiae capiebatur. Non statim morbis curandis operam dedit sed itinerarium in Germaniam incepit ; nonnullos menses cum amico Carolo Patino, numismatista illustri quem Iacobus Mentorem suum appellabat quia quattuordecim annis maior natu erat, anno 1670 Agentorati commoratus est. A patribus enim, medicis Guidone Patino et Carolo Sponio, longa amicitia et diuturno epistolarum commercio inter se connexis filii et ipsi ambo medici et antiquitatum amatores velut hereditatem paternam amicitiam inter se libenter acceperunt. Circa octoginta epistulae a Carolo Patino ad Iacobum Sponium inter 1670 et 1680 missae servantur, qui Patinum exsulem de rebus Francicis certiorem faciebat et pro eo numismata antiqua emebat vendebatque nec religio diversa quicquam obstabat. Cum multis aliis eruditis in Republica Litteratorum aliquanti aestimatis epistularum beneficiorumque mutuorum commercio coniunctus erat ut abbate Nicasio et numismatistis Ioanne Foy-Vaillant, Sebastiano Fesch, Andrea Morellio, Antonio Galland, historico Argentoratensi Boeclero etc.

Et anno 1674 ab Italia magnum itinerarium per Imperium Ottomanicum, in Dalmatiam, Graeciam, litus Asiae Minoris cum Georgio Wheler suscepit e quo futuris libris materiem collegit ː nam illae regiones ut quae in Turcorum dicione positae, tunc temporis Christianis aditu faciles non erant. Inscriptionibus et numismatibus ad Reformationem Calvini tuendam quoque utebatur, cuius placitis toto animo adhaerebat. Ita ut iam diximus extrema vita (nondum triginta novem annos natus erat) vexationes religiosas in Helvetiam effugit. Semper tamen praecipuum officium in vita curationem aegrorum aestumavit esse, antiquitatum studium vero oblectamentum otii.

Opera

Frontispicium libro Recherches curieuses d'antiquité praepositum.

Siquidem prima opera ad antiquitaes et peregrinationem orientalem spectant, ultimis annis in controversia adversus catholicos Iacobus Sponius religionem suam scriptis defendere conabatur. Frustra quidem quoniam Ludovicus XIV anno 1685 protestantes e regno expulit nisi abiurassent.

? 1671 ː De l'usage du caphé, du thé, et du chocolate. A Lyon, chez Jean Girin, & Barthelemy Riviere. Hic libellus non minus Iacobo Sponio quam Silvestri Dufour tribui solet^[1]. Erant quidem amici, ut iam apparet ex litteris Caroli Patini, et anno 1685 apothicarius Silvester Dufour Iacobi Sponii comes in ultima fuga fuit, Hoc opusculum Latine postea bis in lucem prodiit, 1685^[2] et 1699^[3].
1673 ː Recherche des antiquités et curiosités de la ville de Lyon, ancienne colonie des Romains et capitale de la Gaule celtique... avec un mémoire des principaux antiquaires et curieux de l'Europe, Lyon, J. Faeton. Iterum editus 1675 et 1857. Apographum primae eitionis apud Minkoff reprint, anno 1974. Ad maiorem urbis natalis gloriam, Petro de Carcavy Regiae Bibliothecae custodi qui Sponio aditum ad nummophylacium Ludovici XIV dederat dedicatum.
1674 ː Relation de l'état présent de la ville d'Athènes, ancienne capitale de la Grèce, bâtie depuis 3400 ans : avec un abrégé de son histoire et de ses antiquités, A Lyon : chez Loüis Pascal.
- De l'Origine des estrenes, discours historique et moral, contenu dans une lettre, sine loco
- Discours sur une pièce antique & curieuse, du cabinet de Jacob Spon, docteur medecin aggregé au College de Lyon. Representée dans la planche suivante, Lyon, J. Faeton. Francisco Graverom, patrono et antiquario Nemausensi dedicatum.
1676 ː Ignotorum atque obscurorum quorundam deorum arae, nunc primum in lucem datae notisque illustratae, studio Jacobi Sponii, med. doct. collegio medicorum Lugdunens. aggregati , Lugduni, typis Jacobi Faeton. Reeditus 1699 in Thesauro Antiquitatum Gronoviano
1678 ː Voyage d'Italie, de Dalmatie, de Grèce et du Levant, fait aux années 1675 & 1676 par Jacob Spon docteur medecin de Lyon, & George Wheler gentilhomme anglois. A Lyon, chez Antoine Cellier. Tria volumina in-12 cum figuris aeneis. Tomus I, Tomus II, Tomus III. Fuerunt postea versiones Italiana (1688)^[4] et Germanica (1681)^[5]. Reverendo patri de La Chaize, regis confessori ordinario, dedicatum.
1679 ː Miscellanea eruditae antiquitatis. Hic liber epigraphiae dicatus velut supplemmentum ad Gruterianum thesaurum profertur. Reeditus Lugduni sumptibus authoris anno 1685.
- Réponse à la critique publiée par M. Guillet, sur le voyage de Grèce de Jacob Spon, avec quatre lettres sur le même sujet, Lyon, Th. Amaulry.
1680 ː Histoire de la ville et de l'estat de Geneve, depuis les premiers siecles de la fondation de la ville jusqu'à present : tirée fidellement des manuscrits, par Jacob Spon, docteur aggregé au College des medecins de Lyon, Lyon, Thomas Amaulry. Duo volumina. Reeditus 1682 Lugduni et 1685 Ultraiecti^[6] et 1730 Genavae^[7]. Hollandica (1688^[8]) et Anglica (1687^[9]) versio fuere huic libro.
- Suite du voyage de Grece de Jacob Spon, servant de reponse à la critique publiée par M. Guillet, Lyon et Paris, A. Cellier
1681 ː Observations sur les fièvres et les fébrifuges, à l'occasion du livre intitulé "La Découverte de l'admirable remède anglois", Lyon, rue Mercière^[10]. De cinchona et quinina ab Andibus Peruvianis invecta disserebat.
- Lettres sur l'antiquité de la véritable religion, Lausanne. Reverendo patri de La Chaize respondebat.
1682 ː Lettres curieuses touchant la religion, Cologne
1683 ː Recherches curieuses d'antiquité contenues en plusieurs dissertations, sur des médailles, bas-reliefs, statues, mosaïques & inscriptions antiques ... , Lyon, Th. Amaulry. Ille codex trigita unam breves dissertationes de variis rebus complectebatur, plerasque ab ipso Sponio concinnatas, nonnullas vero ab aliis ei missas ut a Carolo Patino, a Francisco Graverol, a Claudio Du Molinet, Sanctae Genovefae bibliothecario, ab Antonio Galland...
1684 ː Observations sur les fievres et les febrifuges, par Mr Spon... Seconde edition revûe, corrigée, & augmentée de plus de la moitié Lyon, Thomas Amaulry. Tertia editio posthuma 1687
- Aphorismoi neōteroi = Aphorismi novi ex Hippocratis operibus nunc primùm collecti, & in suas quique classes digesti, notisq́ue illustrati, studio Jacobi Sponii , Lugduni, apud Anissonios ː excerpta Graeca Latine versa et commentati. Aegidio Menagio dedicatum.
1685 ː Miscellanea eruditae antiquitatis : in quibus marmora, statuae, musiva, toreumata, gemmae, numismata, Grutero, Ursino, Boissardo, Reinesio, aliisque antiquorum monumentorum collectoribus ignota, & hucusque inedita referentur ac illustrantur, Lugduni, Sumptibus Fratrum Huguetan

Sunt praeterea magis quam 400 litterae manuscriptae in variis bibliothecis servatae tam a Iacobo Sponio missae quam a variis eruditis ei invicem missae quarum editionem criticam nuper praeparavit Yvicus Moreau per dissertationem academicam^[11]

In memoriam

Miscellanea eruditae antiquitatis lib. I (Nundinis Francofurtensibus, 1679): titulus

Variis honoribus a posteris celebratus est ː Lugduni nomen eius saepto publico datum^[12], Societas amicorum Iacobi Sponii^[13] publicationes ad archaeologiam et antiquitatem pertinentes fovet et indagatores antiquitatum Romanarum et Graecarum studiosi officinam suam intra Universitatem Lugdunensem Centre Jacob Spon^[14] appellaverunt.

Notae

↑ Quamquam ipse Sponius in quibusdam litteris ad Petrum Bayle Lugduni datis die 31 Ianuarii 1685^{[nexus deficit]} paternitatem operis amico tribuit.
↑ ,Tractatus novi de potu "caphé", de chinensium "thé" et de chocolata, Parisiis, apud Petrum Muguet, 1685
↑ Genavae
↑ Viaggi per la Dalmazia, Grecia, e Levante, Bologna : Monti
↑ Dalmatische, Griechische und Orientalische Reise-Beschreibung, Nürnberg : Hofmann, 1681. Reed. 1690 et 1713.
↑ Apud Guglum librorum
↑ Apud Guglum librorum. Apographum huius editionis anno 1976 apud Slatkine Genavae in lucem prodiit.
↑ Historie van de Stad en Staat van Geneve, Amsterdam : Oossaan, 1688
↑ The history of the city and state of Geneva, London : White, 1687
↑ Commentarius interretialis Yvici Moreau
↑ Descriptio operis
↑ "médecin et historien lyonnais"
↑ Pagina interetialis Publicationes
↑ Descriptio

Plura legere si cupis

Jean Guillemain, 'Les recherches numismatiques de Charles Patin d'après ses lettres à Jacob Spon' in Quaderni per la Storia dell’Università di Padova, 1996(29) ː45–58.
Marcus Käfer, "Jacob Spon et Bernard de Montfaucon. De la conception de l'art chez les « Antiquaires » et la critique du comte de Caylus", Bulletin de l'Association Guillaume Budé,1983 ː 414-426
Ivicus Krumenacker, "Motivations du travail des antiquaires", Les carnets du LARHRA 2017/2018-1.
Ivicus Moreau, "Jacob Spon et les arts : un savant protestant dans la République des Lettres. Métaphores du beau et signes visuels dans la pensée de Calvin", Chrétiens et sociétés, 2011 ː 91-113
Katharina Santschi, "Jacob Spon et les débuts de l'archéologie régionale", Revue d'histoire de l'art et d'archéologie, 1998(46)
Jacob Spon : un humaniste lyonnais du XVIIe siècle, Lugduni, 1993. ISBN 2-9505633-1-7

Nexus externi

[1] Quamquam ipse Sponius in quibusdam litteris ad Petrum Bayle Lugduni datis die 31 Ianuarii 1685^{[nexus deficit]} paternitatem operis amico tribuit.

[2] ,Tractatus novi de potu "caphé", de chinensium "thé" et de chocolata, Parisiis, apud Petrum Muguet, 1685

[3] Genavae

[4] Viaggi per la Dalmazia, Grecia, e Levante, Bologna : Monti

[5] Dalmatische, Griechische und Orientalische Reise-Beschreibung, Nürnberg : Hofmann, 1681. Reed. 1690 et 1713.

[6] Apud Guglum librorum

[7] Apud Guglum librorum. Apographum huius editionis anno 1976 apud Slatkine Genavae in lucem prodiit.

[8] Historie van de Stad en Staat van Geneve, Amsterdam : Oossaan, 1688

[9] The history of the city and state of Geneva, London : White, 1687

[10] Commentarius interretialis Yvici Moreau

[11] Descriptio operis

[12] "médecin et historien lyonnais"

[13] Pagina interetialis Publicationes

[14] Descriptio

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]