Formula:PaginaMensis/Augusti 2023

Fragmentum statuae equestris Octaviani iuvenis Athenis in Museo Archaeologico Nationali servatum.

Augustus (nomine nativo "Gaius Octavius," adoptione "Gaius Iulius Caesar Octavianus," moriturus "Imperator Caesar Divi filius Augustus," post mortem "Divus Augustus"), Graece Γάϊος Ὀκταούιος, denuo Καῖσαρ Σεβαστός θεός (i.e. "Gaius Octavius", "Caesar Augustus deus"), natus die IX Kal. Octobribus, M. Tullio Cicerone C. Antonio Hybrida consulibus, sive 23 Septembris 63 a.C.n., mortuus die XIV Kal. Septembribus, M. Iunio Silano Torquato L. Norbano Balbo consulibus, sive 19 Augusti 14 p.C.n., fuit dictatoris Gaii Iulii Caesaris heres et bellorum triumviratus secundi victor, qui ab anno 723 a.V.c 30 a.C.n. usque ad mortem Imperio Romano praefuit. Seriem imperatorum vel Caesarum qui Romanis modo monarchico imperaverunt condidit.

Fuit filius C. Octavii equitis plebei et Atiae; haec filia sororis erat C. Caesaris dictatoris futuri. C. Octavius duas filias genuit, quarum maior (e matrimonio primo) Sex. Appuleio nupserit; minor autem, soror Octavii nostri uterina, a M. Antonio triumviro ducta erit. Octavius ipse, natu minimus, Romae natus est "M. Tullio Cicerone, C. Antonio conss. 23 Septembris, paulo ante solis exortum, regione Palati, ad Capita Bubulo," sicut Suetonius minutius refert. A Gaio Iulio Caesare, matris avunculo, per testamentum adoptatus, nomen "C. Iulius C. f. Caesar" a 44 (quo anno ille necatus est) gessit …