Christianus Friedel

Christianus Friedel est actor scaenicus, director cinematographicus et musicus Germanus, Magdeburgi in DDR natus die 9 Martii anno 1979. Iam complura in Germania opera fecit, sed inter gentes hactenus innotuit duobus operibus cinematographicis, scilicet Babylon Berlin, serie televisifica Germanica anno 2017 incepta (in qua personam photographi vigilum Berolinensium egit), et The Zone of Interest, pellicula ab Ionatha Glazer anno 2023 facta (ubi personam Rudolphi Höss, ducis Auschwitz egit).

De cursu vitae

Christianus Friedel annis 2000 ineuntibus scaenicae arti studuit Monaci in schola Otto Falckenberg. Deinde Monaci et Hannoverae in gregibus theatralibus versatus est. Inde ab anno 2009 membrum theatri Staatsschauspiel Dresden partes titulares egit, sicut in Schilleri Don Carlos et Shakesperii Hamlet. Verno tempore 2017 in Düsseldorfer Schauspielhaus personam egit Nathanaelis in Hofmanni fabula Der Sandmann.

Ab anno 2009 Friedel in pelliculis cinematographicis et televisificis prodiit, sicut in Das weiße Band a Michaele Haneke digesta, in qua ludi magistrum egit. Anno 2012 prodiit in Ende der Schonzeit, pellicula a Francisca Schlotterer disposita. Anno 2015 prodiit in Oliveri Hirschbiegel Elser – Er hätte die Welt verändert, in qua personam Georgii Elser egit. Ab anno 2017 personam Reinholdi Gräf, photographi vigilum, in serie Babylon Berlin agit. Anno 2023 personam Rudolphi Höss egit in The Zone of Interest, pellicula a Ionatha Glazer disposita.

Friedel cum Woods of Birnam in Theatro Dresdensi prodit.

Annis 2010 ineuntibus Friedel gregem musicum collegit, quem Shakesperii tragoediae Macbeth memor Woods of Birnam nominavit. Quo in grege, qui de musica pop ad artificiosius et subtilius genus progredi videtur, Friedel non solum cantoris sed etiam clavilistae munere fungitur. Woods of Birnam anno 2014 primum album musicum (nomine gregis instructum) edidit. Deinde edita sunt Searching for William (2017), Grace (2018), How to Hear a Painting (2020), Macbeth (2022), Dorian (2023). Praeterea anno 2020 textum sonigerum (Du bist alles) ad Babylon Berlin contribuit.

Bibliographia

Horst, Carole (2024) ‘Zone of Interest’ Star Christian Friedel Reflects on the ‘Intense Experience’ of Playing a Nazi. Variety, 10 Ianuarii.
Krekeler, Elmar (2015) Christian Friedel und das „volkseigene Gesicht“. Welt, 10 Aprilis.