Rhodophyta
Rhodophyta (Graece ῥόδον 'rosa' + φυτόν 'planta') sunt subdivisio plantarum, cuius nomen ab earum colore saepissime rubro provenit. Inter algas connumerantur; in taxinomia autem biologica tum tamquam divisio,[1] tum tamquam subregnum[2] regni Plantarum habentur. In mutlis linguis, ‘algae rubrae’ (e.g. Anglice red algae, Francogallice algues rouges) appellantur.
Descriptio
recensereRhodophyta sunt plantae omnino flagellis carentes, in chloroplastis lamellas haud aggregatas atque phycobilisomata[3] habentes, necnon amylum in cytoplasmate conditum.[4][5] Quibus characteribus ita a reliquis plantis discrepant, ut in subregnum proprium Rhodoplantarum excludantur, omnibus fere aliis, Chlorophytis nempe, Charophytis, Bryophytis, Pteridophytis, Gymnospermis Angiospermisque, in subregnum Viridiplantarum coniunctis.[4]
Rhodophyta tum unicellularia, tum multicellularia sunt. In quo casu thalli eorum filamentosi uni- vel multiaxiales, vel etiam pseudoparenchymatosi sunt. Generationes in historia vitae saepius tres, gametophytum scilicet, tetrasporophytum et carposporophytum possident, in quo etiam a reliquis plantis generationes duas, gametophytum nempe et sporophytum habentibus differunt.[5]
Inter rhodophyta habentur algae sic dictae calcareae, thallis scilicet fortiter carbonate calcii incrustatis, a Linnaeo inter ‘zoophyta’ connumeratae, nunc intra ordines Corallinalium et Peyssonnellialium inclusae.[6]
Numerus generum hodiernorum Rhodophytorum circiter 910 est, specierum autem 7000 excedit.[7]
Pinacotheca
recensere-
Rhodophyta in Oceano Pacifico ad litus Novae Zelandiae crescentia. -
Rhodophyta in Oceano Atlantico ad litus Africae australis. -
Rhodophyta ordinis Corallinalium (algae calcareae). -
Frondes Rhodophyti indeterminati in herbario. -
Hildenbrandia rivularis, rhodophytum aquae dulcis, in petra in torrente crescens.
Rhodophyta fossilia
recensere.png)
Inter Rhodophyta fossilia celeberrima forsitan est Bangiomorpha pubescens, in petris Proterozoicis insulae Somerset dictae Archipelagi Arctici, abhinc annorum circiter 1 050 000 000 formatis,[8] inventa. Est ergo maximi momenti in palaeobiologia tamquam antiquissima nota planta, antiquissimus notus organismus multicellularis certus, et antiquissimus organismus reproductionem sexualem exhibens.[9]
Sunt etiam fossila antiquiora, Rafatazmia, Denaricion et Ramathallus nunucupata, in petris Indiae abhinc annorum circiter 1 600 000 000 formatis inventa, quae forsitan inter rhodophyta connumeranda sunt, sed cum hac eorum interpretatione haud omnes consentiunt.[10]
De caetero multae algae calcareae fossiles in petris Palaeozoicis, Mesozoicis et Caenozoicis inventae sunt.[11]
Notae
recensere- ↑ Rhodophyta Wettstein, Handb. Syst. Bot. (1901)
- ↑ Rhodobionta G.W.Saunders et Hommersand, Am. J. Bot., 91: 1502 (2004)
- ↑ ‘Phycobilisomata’ – de hoc nomine Latino vide Doweld (2001) Prosyllabus Tracheophytorum, p. LXVIII (ad XVm). [Textus]
- ↑ 4.0 4.1 Saunders, Gary W. & Hommersand, Max H. (2004) Assessing red algal supraordinal diversity and taxonomy in the context of contemporary systematic data. American Journal of Botany, 91 (10): 1494–1507.
- ↑ 5.0 5.1 de Reviers, Bruno (2003) Biologie et phylogénie des algues. Parisiis: Belin. ISBN 2-7011-3512-5
- ↑ Krayesky, David M., Norris, Iacobus M., Gabrielson, Paulus W., Gabriel, Daniela & Frecericq, Susanna (2009) A new order of red algae based on the Peyssonneliaceae, with an evaluation of the ordinal classification of the Florideophyceae (Rhodophyta). Proceedings of the Biological Society of Washington (2009) 122 (3): 364–391.
- ↑ Frey, Wolfgangus (ed., 2017) Syllabus of plant families: Adolf Engler's Syllabus der Pflanzenfamilien (13th ed.). Part 2/2: Photoautotropic eukaryotic algae, Rhodophyta. Berolini: Gebr. Borntraeger Verlagsbuchhandlung. ISBN 978-3-443-01094-2
- ↑ Gibson, Timotheus M., Shih, Patricius M., Cumming, Viviana M.; Fischer, Woodward W., Crockford, Petrus W., Hodgskiss, Malcolmus S.W., Wörndle, Sara, Creaser, Robertus A., Rainbird, Robertus H., Skulski, Thomas M & Halverson, Galen P. (2017). Precise age of Bangiomorpha pubescens dates the origin of eukaryotic photosynthesis. Geology, 46 (2): 135–138.
- ↑ Butterfield, Nicolaus J. (2000). Bangiomorpha pubescens n. gen., n. sp.: implications for the evolution of sex, multicellularity, and the Mesoproterozoic/Neoproterozoic radiation of eukaryotes. Paleobiology, 26 (3): 386–404.
- ↑ Bengtson, Stephanus, Sallstedt, Theresia, Belivanova, Veneta & Whitehouse, Martinus (2017) Three-dimensional preservation of cellular and subcellular structures suggests 1.6 billion-year-old crown-group red algae. PLoS Biol 15 (3): e2000735.
- ↑ Taylor, Thomas N., Taylor, Editha N. & Krings, Michael (2009) Paleobotany. The Biology and Evolution of fossil Plants. Academic Press. ISBN 978-0-12-373972-8