Nova Zembla

Nova Zembla^[1] vel Nova Zemla^[2] (Russice Новая Земля, tr. Novaja Zemlja, Latine Terra Nova^[3]) est archipelagus in Oceano Glaciali Septentrionali (Arctico), pars Russicae regionis Archangelopolitanae.

Vide etiam paginam discretivam: Terra Nova (discretiva).

Descriptio

Nautae Nederlandenses in Nova Zembla cum urso maritimo pugnant. Pictura a Gerhardo de Veer anno 1597 facta.

Inter mare Barentsianum et mare Karense sita est; Pylae Karicae fretum Novam Zemblam a Vaigatia insula separat.

Duae sunt insulae Novae Zemblae principales, insula Borealis^[4] et insula Australis. Freto tenuissimo, fiordo simili, nomine Matoczkin Shar^[5], insulae divisae sunt. Insula Australis paeninsulam magnam Terram Anserinam^[6], ad occidentem spectantem, habet. Extremitas insulae Borealis et archipelagi totius borealis caput Mauritii^[7] est, ubi statio polaris sita est; quo capite mare Barentsianum et mare Karense dividuntur.

Pharus in capite Mauritii

Clima est arcticum, ubi hiemes longae frigidaeque sunt. Tundra insulas operit; insulae Borealis magna pars glaciario perpetuo celata est.

Nova Zembla imprimis innotuit Gulielmi Barentsii et Iacobi van Heemskerk hibernatione necessitate annis ab 1596 ad 1597 ibi coacta. Hoc nomen Latinum, Nova Zembla, titulus pelliculae cinematographicae Nederlandicae anni 2011 de expeditione Gulielmi Barentsii est.

Annis ab 1955 ad 1990 probae armorum nuclearium in Nova Zembla perficiebantur.