Stanley Clisby Arthur

Stanley Clisby Arthur (natus Merced in urbe Californiae die 11 Iunii 1881; die 4 Decembris 1963 Novae Aureliae mortuus) fuit naturalista, archivista, rerum gestarum Ludovicianensium scriptor. Diurnarius operam dedit in California, Texia, Novae Aureliae, Novi Eboraci; Ludovicianam anno 1915 rursus petivit ubi ornithologista civicus usque in 1920 meruit, commentario The birds of Louisiana anno 1918 divulgato.

Director meruit ministerii vitae silvaticae iuxta civitatem Ludovicianae ab anno 1924 usque in 1928; quo munere fungens cum Eduardo Avery McIlhenny collaboravit. Ab 1934 usque in 1940 archivista laboravit iuxta Censum Archivorum Foederalium. Anno insequenti director exsecutivus factus est Musei Civici Ludovicianensis; quo officio usque in annum 1948 functus est.

Auctor fuit vitarum Ioannis Iacobi Audubon ornithologi Ioannisque Laffite piratae, insuper librorum plurium de historia Novae Aureliae et opusculi cuiusdam de potionibus mixtis Neo-Aurelianensibus, titulo Famous New Orleans drinks and how to mix 'em: hoc libro ille primus auctorum de originibus et inventoribus gallicaudarum, de historia gastronomica Novae Aureliae quaesivit. Florilegium imaginum anno 1938 edidit a photographo Eugenio Delcroix factarum, qui architecturam domesticam Novae Aureliae exponere solebat.

Ella Bentley (1881–1959), ancilla litteraria diurnariae Dorotheae Dix, eo nupsit filiosque tres peperit. Illa sub nomine Ella B. Arthur auctrix fuit carminum Songs of a Creole City, and other poems (1950) necnon vitae Dear Dorothy Dix: The Story of a Compassionate Woman (1952, cum Harnett T. Kane); post quam florilegium epistularum ad Dorotheam Dix scriptarum edidit, titulo My husband keeps telling me to go to hell (1954). Cum marito iamdudum divulgaverat fabulam puerilem Sonny Boy's Day at the Zoo (1913).

Scripta

• 1913 (cum Ella Bentley Arthur) : Sonny Boy's Day at the Zoo
• 1915 : The story of the battle of New Orleans. Novae Aureliae: Louisiana Historical Society Textus
• 1918 : The birds of Louisiana (State of Louisiana, Department of Conservation, Bulletin no. 5). Novae Aureliae (editio magnopere aucta, Bulletin no. 20, 1931)
• 1928 : The fur animals of Louisiana (State of Louisiana, Department of Conservation, Bulletin no. 18). Novae Aureliae; 2a editio 1931; appendix ab Eduardo McIlhenny scriptus
• 1931 (cum George C. Duchet de Kernion) : Old Families of Louisiana
• 1935 : The story of the West Florida rebellion; Textus interretialis
• 1936 : Old New Orleans. Novae Aureliae: Harmanson (editio sexta, 1944; anno 1990 rursus edita sub titulo Walking tours of old New Orleans, vide infra)
• 1937 : Famous New Orleans drinks and how to mix 'em. Novae Aureliae: Harmanson; impressio 1938; editio 1939
• 1937 : Audubon, an intimate life of The American woodsman. Novae Aureliae: Harmanson
• 1938 (editor) : Patios, stairways and iron-lace balconies of old New Orleans: a series of photographs by Eugene A. Delcroix. Novae Aureliae: Harmanson; Textus
• 1950 : Louisiana tours
• 1952 : Jean Laffite, Gentleman Rover. Novae Aureliae: Harmanson
• 1976 (editor) : Index to the dispatches of the Spanish governors of Louisiana, 1766-1792. Novae Aureliae: Polyanthos; Exemplar mutuabile

Bibliographia

• Necrologia in New Orleans Times-Picayune (5 Decembris 1963)
• "Arthur, Stanley Clisby" in Dictionary of Louisiana Biography (3 voll. 1988–1998)
• Susan Cole Doré, ed., Walking tours of old New Orleans by Stanley Clisby Arthur (Gretna Ludovicianae: Pelican, 1990) pp. 9–10 Exemplar mutuabile

Nexus externi

• "Stanley Clisby Arthur" apud Cocktail Kingdom
• "Stanley Clisby Arthur" apud Find a Grave