Carolus Sealsfield

Carolus Sealsfield (Theodisce Karl Anton Postl, natus Popice in vico apud Znoyman die 3 Martii 1793, mortuus Soloduri die 26 Maii 1864) fuit scriptor et diurnarius Austriacus. Qui in auctoribus classicis litterarum Theodiscarum in Civitatibus Foederatis exaratarum numeratur et narrator realisticus epochae Biedermeier est.

Scriptor anno 1863. Christophorus Ludovicus Rust Soloduri photographus erat.

Scriptor anno 1864. Augustus Neumann pinxit secundum Rust.

Vita

Agricolae filius gymnasium frequentans et in ordinem Ordinis militaris Crucigerorum cum rubea stella ingressus studuit inter annos 1808 et 1815 theologiam. Sacerdos ordinatus est anno 1814 Pragae. Anno 1823 per Helvetiam in Americam emigravit, ubi primo sub variis nominibus vixit, deinde sub nomine Carolus Sealsfield, et 1858 civis factus est. In Europam anno 1826 reversus tamquam diurnarius operam dabat et Londinii publicavit itinerarium duorum voluminum praetitulatum The United States of North America (1827). Quo libro emolumentum systematis democratici-reipublicani Americani exemplum imitandum conservatoribus Europaeis ante oculos proiecit. Restaurativae ideae reprehenduntur ab eo etiam in libro Austria as it is (1828). Usque annum 1858 pluries adhuc Americam adiit; interdum extraneus diurnarius Lutetiae Londiniique et fortasse scriba privatus Hortensis, reginae Nederlandiae, creatus est.

Ex annis 1832/33 scriptor liber vitam degit in Helvetia. Fabulae Milesiae eius de rebus contemporaneis, quas Iacobus Fenimore Cooper atque Gualterus Scott moverant, titulo Tokeah, or The White Rose (1828), Der Virey und die Aristokraten (1835), Lebensbilder aus beiden Hemisphären (1835-1837) et Das Cajütenbuch oder nationale Charakteristiken (1843) imagines varias, quasi centonem, de terra contintenti Americae Septentrionalis multis cum ethographicis et bellissimis naturae descriptionibus dant. Omnia ea Europaei mente liberali ante Res novas Germanicas anni 1848 enthei legebant. In innumerabilibus litteris infantibus adulescentibusve destinatis, ubi argumentum est de rebus periculis suscipiendis et gestis bubulcorum, exemplum narrativum Caroli Sealsfield reperiebatur.

Mansio Caroli Sealsfield, via montana Soloduri, no. 49.

Annos a 1858 usque ad mortem, 1864, Sealsfield, post quinque annos in Civitatibus Americanis nunc civis Americanus, in mansione propria Soloduri habitabat. Amici sui hic erant scriptores Solodorenses Alfredus Hartmann, Franciscus Krutter, procurator Iacobus Amiet, homo politicus Stephanus Gutzwiller et scriptor Hungaricus Carolus Maria Kertbeny.

Fons

Fischer, Cornelia. "Sealsfield, Charles", apud: Microsoft Encarta 2007 Enzyklopädie, Microsoft Corporation, 2006 (DVD)

Nexus externi

Vicimedia Communia plura habent quae ad Carolus Sealsfield spectant.

• Charles Sealsfield in Deutsche Biographie (Theodisce) – Biographia apud ADB & NDB
• Opera in interrete legibilia
• Pagina domestica Associationis internationalis Charles Sealsfield dicatae
• Argumenta librorum