Wilhelm-Dörpfeld-Gymnasium

Wilhelm-Dörpfeld-Gymnasium est schola Elberfeldensis in medio monte Johannisberg dicto iuxta odeum civitatis sita, quae instituta est ad linguas et veteres et modernas pariter colendas. Iamdudum orta, nempe anno 1592, nomen suum non prius quam anno 1936 traxit ab alumno clarissimo.

Incipit pars historica

De classe Latina instituta

Etiam ante rerum ecclesiasticarum reformationem Elberfeldenses scholam habuisse satis constat, sicut patet ex testamento quodam anno 1519 in favorem „ludimoderatis“ eorundem conscripto. Quae schola autem doctrina linguarum neglecta nullam nisi simplicem tantum eruditionem praebuisse dicitur. Qua de causa vetus gymnasium Elberfeldense se nequaquam ante annum 1592 ortum esse profitebatur, quo anno reformata, ut dicunt, ecclesia Elberfeldensis scholae suae classem adiunxit Latinam, cui rector proprius praepositus est non solum linguam Latinam, sed etiam Graecam et Hebraicam docturus. Ex quo anno omnis eruditio superior in urbe, quam nunc Wuppertal autumant, coepisse dicatur.

Fundata autem est classis Latina super beneficia altaris S. Catharinae, quae classis instituta est ad adulescentes eo melius praeparandos, ut academiam quandam vel universitatem intrare possint. Quibus temporibus plurimi iuvenes Elberfeldenses academiam illustrem Nassovicam-Herbornensem, vel postea Brandeburgicam Electoralem, quae Teutoburgi Cliviorum florebat, petere solebant.

De institutionis locis mutatis

Wilhelm-Dörpfeld-Gymnasium

Schola Latina una cum schola Germanica, ut dicebatur, usque ad annum 1830, quo anno schola mercatoria segregata est, sub eodem tecto extitisse traditur.

Prima domus iuxta coemiterium S. Laurentii sita anno 1687 cum tota fere urbe incendio vastata est. Tum ptochotrophium in platea Mäuerchen dicta situm utramque scholam per 31 annos recipiebat. Anno autem 1718 schola in novam domum in ipso primae scholae loco aedificatam remigravit. Anno vero 1821 schola tralata est in sodalitatis litterariae domum, quae sita erat in platea viridi dicta. Anno autem 1876 locus iterum cum scholae negotiatoriae domo in monte Döppersberg sita mutatus est.

Anno 1893 tandem sedes, quam etiam nunc obtinet, gymnasio data est. Aedificia vero anno 1943 bello deleta sunt. Tum disciplina in locis remotioribus, quos tutiores putabant velut urbem Gera, continuabatur. Finito bello nonnulli praeceptorum et discipulorum iam mense Octobri anni 1945 in urbem Wuppertal reverterunt et in aedificio quodam argentariorum municipalium conveniebant. Domus bello deleta in eodem loco ac prius, mutata quidem facie, reconstructa est et ex eo scholae usui est.

Anno 2012 materia venenosa nomine asbestus ubique in parietibus aedificii inventa statutum est aedificium esse delendum. Eodem loco scholam reconstrui consilium est.

De legibus datis vel condicione constituta

Vetustissimae leges utriusque scholae Elberfeldensis anno 1612 institutae esse videntur, quae bis tantum intra saeculum revisae usque ad annum 1707 valebant.

(continuandum)

Incipit recensio alumnorum illustrissimorum

Garnerius Teschenmacher rerum scriptor et theologus, 1590–1638
Casparus Sibelius theologus, 1590–1658
Fridericus Engels philosophus, 1820–1895
Gulielmus Dörpfeld archaeologus, 1853–1940
Eduardus ab Heydt artificum maecenas, 1882–1964
Martinus Niemöller theologus, 1892–1984
Christophorus Maria Herbst histrio, * 1966

Incipit recensio praeceptorum illustrissimorum

Hermannus Crusius philologus et poeta, 1640–1693
Fridericus Adolphus Gulielmus Diesterweg paedagogus, 1790–1866
Carolus Guilielmus Bouterwek conditor sodalitatis historicae Montanae, 1809–1868
Adolphus Kolping ecclesiae Romanae presbyter, 1813–1865
Gulielmus Crecelius rerum scriptor, 1828–1889
Carolus Bardt philologus, 1843–1915
Georgius Kaibel philologus, 1849–1901
Richardus Hoche philologus, 1854–1906
Joannes ab Arnim philologus, 1859–1931
Augustus Frickenhaus archaeologus, 1882–1925
Carolus Gulielmus Weeber rerum scriptor et philologus, * 1950

Incipit recensio fontium

Wilhelm Bouterwek, Geschichte der Lateinischen Schule zu Elberfeld, Elberfeldiae 1865
Ludwig Scheibe, Zeittafel der Geschichte der Lateinischen Schule und des aus ihr hervorgegangenen Gymnasiums in Elberfeld, Elberfeldiae 1893
Fritz Jorde, Geschichte der Schulen von Elberfeld, Elberfeldiae 1903
Erinnerungsschrift zur Hundertjahrfeier der am 24. Februar 1824 erfolgten staatlichen Anerkennung des Gymnasiums, Wuppertal 1924
Geschichte(n) aus dem WDG, 1579–2004, hrsg. von Elke Brychta zum 425-jährigen Jubiläum, Wuppertal 2004
Grüne Blätter (Sodalitatis gymnasio favendo nuntii)

Incipiunt nexus quidam externi

Vicimedia Communia plura habent quae ad Wilhelm-Dörpfeld-Gymnasium spectant.