Ioannes Cantius

Ioannes Cantius (natus Kęty in oppido tunc Silesiano anno 1390; mortuus Cracoviae anno 1473) fuit sacerdos et professor universitarius in theologicis. Istius sancti memoriae in calendario catholico hodierno dies 23 Decembris reservatur. Summus patronus dioecesis Cracoviensis est; insuper habetur patronus iuventutis, studiosorum, scholarum catholicarum. In imaginibus videmus eum toga professoris indutum, qui librum in manu tenet.

De vita docta atque humili

Stanislao et Anna piis et honestis parentibus natus, morum suavitate et innocentia, ab ipsa infantia spem fecit maximae virtutis. Sacerdotio studium christianae perfectionis auxit. Ilcusiensem paroechiam annis aliquot egregie administravit. Aetate annorum XXIII philosophiae studere coepit; magistratum artium anno 1418 nactus est. Anno 1421 rector scholae claustralis in oppido Miechów factus est; ibi lingua Polonica de notionibus Augustini Hipponensis praedicabat.

Cracoviae humaniora et theologiam docebat studentes multos: illis explicabat epistulas Paulinas, Petri Lombardi Sententias et Thomae Aquinatis Summam theologiae. Neque sprevit logica, physica et oeconomica Aristotelica. Plures annos decani universitarii munere functus est. Praebendas autem sibi oblatas accipere noluit dicens verum laborem academicum officia alia non ferre. Prelis mandati sunt eius sermones et tres commentarii in evangelistam Matthaeum. Roma visa ad terram Israël tractus est, ut dicitur.^[1]^[2] Syrma eius in diaetis universitariis portatum diu in novis decanis investiendis adhibitum est.

Quidquid temporis a studio supererat, partim saluti aliorum sacris praesertim concionibus curandae, partim orationi dabat. Quater ad Apostolorum limina, pedes et viaria onustus sarcina, venit, tum ut Sedem apostolicam honoraret, tum ut sui – sic enim aiebat – purgatorii poenas exposita illic quotidie peccatorum venia redimeret. Virginalem pudicitiam vigilantissime custodivit, et ante obitum per annos triginta circiter et quinque ab esu carnium abstinuit. Somnis brevibus se dare solebat et ieiunia observare semper solitus erat; eleemosynas pauperibus dare fas erat. In vita huic veritati obtemperabat: Conturbare cave: non est placare suave. Infamare cave; nam revocare grave.^[3]

Cracoviae, pridie Nativitatis Christi anima eius in caelum evolavit. A Clemente XIII papa fastis Sanctorum adscriptus, inter primarios Poloniae ac Lituaniae patronos colitur. Ossa in catacumbis ecclesiae Sanctae Annae condita sunt, Cracoviae.

Nexus externi

Vicimedia Communia plura habent quae ad Sanctum Ioannem Cantium spectant.

"Saint John of Kenty: Patron Saint of Teachers, Students, Priests and Pilgrims"
Ioannes Stadler: "Johannes Cantius, S. (143)" - apud: Vollständiges Heiligen-Lexikon, tomus 3, Augustae Vindelicum 1869, p. 259-261
Adolphus Schimmelpfennig: "Cantius, Johann" - apud: Allgemeine Deutsche Biographie (ADB), tomus 3, Duncker & Humblot, Lipsiae 1876, p. 768
Petrus Einar Odden: "Den hellige Johannes av Kęty" - in paginis Norvegicis
Stanislaus Hołodok: vita paucis verbis - apud: Czas Miłosierdzia 10/2003

Notae

↑ Stanislaus Hołodok dicit Ioannem Cantium tantummodo ecclesiam Fratrum cruciferorum ordinis custodum sepulchri Hierosolymitani in Miéchow visitavisse et ibi terram importatam tetigisse; eum ipsum autem numquam in Terra Sancta fuisse.
↑ basilica SS. Sepulcri (ad Miéchow)
↑ Ioannes Godrycz: "St. John Cantius" - apud: The Catholic Encyclopedia, Neoeboraci 1910

[1] Stanislaus Hołodok dicit Ioannem Cantium tantummodo ecclesiam Fratrum cruciferorum ordinis custodum sepulchri Hierosolymitani in Miéchow visitavisse et ibi terram importatam tetigisse; eum ipsum autem numquam in Terra Sancta fuisse.

[2] silica SS. Sepulcri (ad Miéchow)

[3] Ioannes Godrycz: "St. John Cantius" - apud: The Catholic Encyclopedia, Neoeboraci 1910

[1]

[2]

[3]