Philippus Iulius Lieberkühn

Philippus Iulius Lieberkühn, paedagogus sua aetate clarissimus, die 6 Novembris 1754 in oppido Wusterhausen ad flumen Dosse in Prussia sito natus est. Obiit die 1 Aprilis 1788 Vratislaviae.

In universitate studiorum Halensi in theologiam incubuit. Ab anno 1777 usque ad annum 1784 una cum amico suo Ioanne Stuve scholae Latinae oppidi Neuruppin praefuit, quam primam omnium scholarum publicarum in Prussia praecepta Ioannis Bernhardi Basedow observans reformavit. Deinde se Vratislaviam contulit, ubi munere professoris theologiae asceticae exegeticaeque et inspectoris scholarum evangelicarum et rectoris gymnasii Elisabethani fungebatur. Primus libro illo ab Ioachimo Heinrico Campe conscripto, cui titulus est Robinson der Jüngere, vestem Latinam induit. Liber translatus, qui Robinson Secundus inscribitur, Zullichoviae anno 1785 primo editus est.

Opera

Robinson Secundus

• Editio prima, Zullichoviae 1785.
• Editio altera, Züllichoviae 1789.
• Editio tertia, Züllichoviae 1794.
• Editio quarta, Jenae 1802.

Nexus externus

• Bernd Platzdasch: Philipp Julius Lieberkühn (1754–1788). Skizze seines Lebens und Wirkens, Heidelberg 2012 (De vita Philippi Iulii Lieberkühn)