Naomi Mataʻafa
Fiamē Naomi Mataʻafa (Apia in urbe die 29 Aprilis 1957 nata) est politica Samoae. Filia est primi ministri initiatoris Fiamē Mata'afa Mulinu'u, qui civitatem ab anno 1959 usque in 1976, tribus annis exceptis, gubernaverat. Naomi Mataʻafa, in urbe nativa et in Wellington Novae Zelandiae educata, alumna est Universitatis Victorianae eiusdem urbis.
.jpg)
Ab anno 1985 legata est parlamento Samoano pro circulo Lotofaga. Ministra eruditionis ab 1994, ministra a mulieribus ab 2006, ministra iustitiae ab 2011 meruit. Ab 2016 prima ministra vicaria fuit, primo ministro Sa'ilele Malielegaoi. His annis sodalis factionis "protectionis iurum humanorum" erat, sed anno 2021 ineunte, legem de terris titulisque nuper actam aegre ferens, ad novam factionem "Samoae per fidem unitae" se adiunxit. Cuius factionis dux, comitiis victrix, prima ministra Samoae die 24 Maii 2021 inaugurata est, prima feminarum.
Non sine aemulis honores suos nacta est. Iamdudum in Nova Zelandia absens, patris haeres legitima sed cognatis pluribus causas suas urgentibus, titulum principis (matai) difficulter anno 1978 vindicavit. Recenter etiam, nova factione maioritatem vocum iactante, primus minister Sa'ilele Malielegaoi officium suum duos menses contra leges retinuit, sed die 23 Iulii 2021 iussu curiae supremae eiectus est.
Bibliographia
recensere- "Samoan PM Fiamē Naomi Mata'afa on leadership, legacy and the influence of overseas Samoans" in New Zealand Herald (23 Iunii 2022)
- Fiamē Naomi Mata'afa, "Moving beyond the rhetoric of gender equality" (15 Iunii 2022) apud DevPolicy Blog
Nexus externi
recensere- "Hon Fiame Naomi Mataafa" apud Pacific Women in Politics
 | |
|
Mata'afa Mulinu'u II 1959 • Lealofi IV 1970 • Mata'afa Mulinu'u II 1973 • Tufuga Efi 1976 • Va'ai Kolone 1982 • Tufuga Efi 1982 • Tofilau Eti Alesana 1982 • Va'ai Kolone 1985 • Tofilau Eti Alesana 1988 • Sa'ilele Malielegaoi 1998 • Naomi Mataʻafa 2021 Capsae cognatae: Principes Samoae | |