Marius Reali

Marius Lucretius Reali (natus in Foiano apud Clanim, in Provincia Arretina, die 9 Octobris 1939) est vel gasii vel petrolei procurator nec non poeta itemque scriptor Italicus.

Vita

Reali Moscuae, apud Universitatem studiorum Lomonosovianam, deinde, in Athenaeo Bononiensi, doctor chemiae renuntiatus, ad Russos cum migrasset, in Foederatione rerum publicarum socialisticarum sovieticarum suum constituit domicilium, ubi functus est patrocinio negotiorum pro Italicis societatibus effectoriis, quibus nomen Montedison, ab a. 1967 ad a. 1981, et Eni, ab a. [1981 ad a. 1991.

Postea, vero, Mercatorum Russorum Italorumque Coetui moderatus, cuius sedes est Moscuae, ab a. 1991 ad a. 1993, inter proceres societatis Eni, novo officio praepositus, cum rediisset, primum, negotiator responsalis est creatus pro Consociatione quae a Liberis Civitatibus nomen ducit, exinde, fuit eiusdem consultor, ab a. 2002 ad a. 2005. Hac praeditus auctoritate, gasii ductum, cognominatum Rivum Caeruleum (Anglice: Blue Stream), qui a quibusdam rei peritis, propter arduas exstructionis implicationes, in orbe maximus esse praedicatur, cum aliis technicis efficiendum curavit. Praeterea, iussu primorum Eni, egregiam navavit operam et ad novorum gasii ductuum instructiones et ad refectionem eorum qui erant partim restituendi, partim ad praesentis aevi necessitates accommodandi atque, eodem tempore, pactiones mercatorias confecit ad petroleum methanumque perducendum ex Russiae regionibus usque in Italiam studuitque plurimum, ut utrumque elementum e venis subterraneis in re publica Cazastania sitis, e regione Caracaganacensi et Casaganensi, sedulo hauriri inciperet.

Viros inter paucos ex occidente oriundos ipse quidem adnumeratur, cui insigne illud honoris a societate gasii procurandi, quae Gazprom] nuncupatur, et annis 1999 et 2005 tributum sit, cum ipse operator bene meritus exstitisset de petroleo methanoque inveniendo, quod praemium huius industriae machinalis moderatores iis unis solent largiri qui actuosiores fuerint in hydrogenanthracum effossionibus provehendis.

Ab anno 2005, Marius Reali se totum contulit vel ad prosas, vel ad carmina scribenda. Tria enim edidit lyricorum collectanea, quae criticorum consensum excitarunt quibusque hi sunt indices: Tramonto in Europa, liber, a. 2006, Praemio Litterario Internationali insignitus a Sancta Marinella appellato; L’anima corrotta, opus Praemio Litterario Internationali cui index Agape, a. 2007, honestatum L’uomo a quanti, volumen foras datum a. 2008, cuius poematia, eodem anno, Augustae Taurinorum, apud Mercatum Librorum Internationalem, ab Alexandro Teti, editore ipsius, una cum Mario Geymonat et Paulo Lagazzi, coram spectatoribus exhibita sunt.

Index notitiae

• Boffitto Carolus, "L'atteggiamento delle imprese italiane in Russia", ICE, Ianuarius, a. MMI, pagina XII.
• "Specchio" (La Stampa) XII Octobris, a. MMV
• Emporium libri "Mondadori" Venetiis, XIV Aprilis, a. MMVII^{[nexus deficit]}
• "Report", Rai Tre, "La via del gas", XXVII Majus, a. MMVII
• "Il Giornale", XXI Novembris, a. MMVI
• "Le Voci della Luna, Rivista Culturale", numerus XXXVIII, Julius a. MMVII
• RadioUno, Zapping II^{[nexus deficit]} - XI^{[nexus deficit]}, XXVI et XVIII Martii, a. MMIX
• Poesia, Mensile Internazionale di Cultura Poetica, numerus CCXLII, MMIX Octobris^{[nexus deficit]}