Laurentius de Regio

Laurentius de Regio (in variis fontibus Frate Lorenzo da Reggio, Friar Laurence) est persona fabulae Italianae in urbe Verona gestae; Romei enim amore Iuliettae captus clam in matrimonium ducit adiuvante amico fratre Laurentio Franciscano; quae res ex inimicitia familiarum mortem amantium amborum movet.

"Cellula Fratris Laurentii" a Becker picta: photographema Goupil & Cie e libro Gallery of Shakespeare illustrations (Bostoniae: Little, Brown, 1909)

"Romeo and Juliet: actum V scaenam 3" Iacobus Northcote, ludo scaenico Shakesperiano Romeo and Juliet inspiratus, anno 1789 pinxit: videntur Romeus iam sua manu mortuus, Iulietta etiam viva, frater Laurentius qui tragoediam revelat (Bibliotheca Shakesperiana Folger)

"Romeo and Juliet: ad sepulchrum" Iosephus Wright Derbiensis anno 1790 pinxit: videntur Romeus mortuus, Iulietta sibi manum inlatura, umbra fratris Laurentii (Museum et Pinacotheca Derbiensis)

Historia primum anno fere 1530 a Ludovico da Porto in libello Historia novellamente ritrovata di due nobili amanti refertur; post eum a Matthaeo Bandello in collectaneo Novelle anno 1554, titulo renovato "La sfortunata morte di due infelicissimi amanti, che l'uno di veleno, e l'altro di dolore morirono". Huius versio Francogallica (titulo "Histoire ... de deux amants, dont l'un mourut de venin, l'autre de tristesse") Petrus Boaistuau in collectaneo Histoires tragiques anno 1559 inclusit (quem librum partim ille, partim Franciscus de Belleforest confecerat). Historia de Romeo et Iulietta ex Histoires tragiques Gulielmus Painter Anglice vertit oratione soluta annoque 1567 divulgavit, titulo The Goodly Hystory of the True and Constant Love between Rhomeo and Julietta; iam autem Arthurus Brooke in carmine verterat cuius titulus est The Tragicall Historye of Romeus and Iuliet, anno 1562 divulgatum. E lectura carminis a Brooke compositi Gulielmus Shakesperius anno fere 1592 ludum scaenicum suum Romeo and Juliet elaboravit.