De laude Flandriae
Flandria, dulce solum, super omnes terra beata,
tangis laude polum, duce magno glorificata.
Flandria, Gallorum decus et robur generale,
et timor Anglorum, sceptrum petis imperiale.
Flandria diva, paris reges magnos comitesque,
cum ducibus claris claras dominas, equitesque.
Flandria, Francorum regi Bertam sociasti,
nec minus Anglorum regem Mathilda beasti.
Flandria, regali de stirpe tua generatur
hac, cui sponsali nexu Caesar sociatur.
Flandria, reginam Danis cum laude dedisti,
hanc ipsam dominam post Apuliae statuisti.
· · · · · ·
Flandria, si propero de laude tuoque decore
summa loqui, numero stellas studio leviore,
et quamvis Cicero nostro sonet omnis in ore,
non tamen enumero quanto sis plena valore.
Flandria, fertilitas manet in te divitiarum,
te facit utilitas patriam dominam patriarum,
quam proba nobilitas regit et colit indigenarum.
Petrus Pictor
