Iosephus Sinigaglia

Iosephus (Giuseppe) Sinigaglia (natus Novi Comi die 28 Ianuarii 1884; mortuus Fani Sancti Viti ad Turrim die 10 Augusti 1916) fuit remex atque miles italicus, voluntarius militiam secutus ac argenteo militari decore ornatus.

Vita

Cursus athleticus

Sodalis Consociationis Gymnicae Comensis fuit atque est palaestrita, luctationibus atque praecipue remigiis usus. Anno 1903 expulsus a Consociatione propter licentiam, professus est nomen in Societatem Remigum Larii cum alteris comitibus. Multa vicit certamina cum hac societate atque fecit cum athleta Theodoro Mariani validam amicitiam. Anno 1907 vicit Italicum quoddam certamen et anno 1911 idem Europaeumque, comite Mariani. Consecutus est magnam victoriam die 4 Iulii 1914, in flumine Tamesi, in certamine appellato Calvarum Adamantinarum^?, cuius primus ex Italicis particeps fuit. Sinigaglia percepit praemium a Regina Britanniarum.

Bellum mundanum primum

Josephus Sinigaglia in navicula

Anno 1915, coorto bello, Sinigaglia nomen dedit in Regium Exercitum Italicum. Ob magnam staturam atque praestantiam suas assignatus est 2º Turmae "Militum Pyrobolariorum Sardiniae". Peractis exercitationibus, venit ad turmam suam mense Septembri, est in succenturionis minoris gradum promotus et interfuit duobus impetibus in montes apud Goritiam. Anno 1916, postquam est turma missa apud Vicetiam ut obsisteret incursui, germanice “Strafexpedition” vocato, exercitus Austro-Hungarici rediit, aestate, in primam frontem Carsicam, ubi est succenturio maior factus. Hic, mense Iulio, interfuit incursibus ad montem Sancti Michaelis capendum. Die 9 Augusti, Sinigaglia, ducente comitatu, impetum fecit in cacumen 4 montis Sancti Michaelis, quod, multis amissis viris, est captum. Dum locum constituit captum, Sinigaglia, ut solebat, se exposuit in conspectu hostium atque est in ventrem multis glandibus sclopeti polybolici percussus. Postquam vesperi apud valetudinarium Craulii latus est, mortuus est, post meridiem, die 10 Augusti anno 1916. Propter audacem rem gestam diei prioris, est argenteo militari decore virtutis causa ornatus.

Insigna tributa

Decus argentum militare, virtutis causa

Argenteum militare decus virtutis causa

«Cum comitatus deberet, percurrens vallum in prima fronte, transire locum sub coniectu acri sclopeti cuiusdam polybolici hostium, voluit ibi consistere ut posset mirabiliter excitare milites. Ibi mortifero ictu percussus fortiter cecidit.»

Mons Sancti Michaelis, 9 Augusti 1916

Dedicationes

Comi, patriae suae, ei dicata sunt:

Stadium “Iosephus Sinigaglia”
Via Iosephus Sinigaglia, apud stadium
Piscina quaedam, sita in via eadem
Sectio Comensis Associationis Nationalis Pyrobolariorum Sardiniae
"Societas Remigum Larii - I. Sinigaglia"
Monumentum quoddam, situm apud lacum

Bibliographia

Mauricius Casarola, Lo chiamavano Sina, Nordpress Edizioni, 2007.
Marius Bazzi, Il gigante buono, Tipografia Commerciale Prini & C., Como.
Andreas Benzi, Nicolaus Figundio, Il volontarismo di guerra e l'Associazione Nazionale Volontari di Guerra a Como, ISVIG, 2007
Albo d'Oro dei Decorati della provincia di Como, curatum ab Instituto Teniae Caeruleae – Foederatione Comi.