Henricus Borchert

Henricus, vulgo Erich Borchert ( natus die 16 Februarii 1907 Erfordiae, mortuus die 25 Septembris 1944 in ergastulis Karlag apud Karaganda) fuit pictor et architectus Germanicus et Sovieticus.

Vita

Pueritiam transegit Erfordiae. Annis inter 1926 et 1929 Dessaviae studuit picturae parietali in instituto Bauhaus, magistris Paulo Klee, Basilio Kandinski et Leonello Feininger. Studia perfecit anno 1930 diplomatibus artificis architectique coronatus. Iam anno 1928 cellam politicam communisticam a Bauhausiensibus conditam intraverat.

Studiis peractis cum circa 30 aliis Unionem Sovieticam petivit ad terram per ingentes constructiones renovandam. Moderante domno Hinnerk Scheper Moscuae habitavit officio fungens in sectione quadam, cui colorum studium eorumque usus in architectura urbana cordi fuit. In nomine graphei Maliarstroi et frontibus domuum externis et supellectilibus studebat. Inde fiebat, ut Henricus Borchert artisticam vim opemque in habitaculis exornandis in tota Unione Sovietica dare posset. Anno 1933 expositio in eius honorem in ipso Museo Puškin facta est. Cum Ioannes Meyer et Hinnerk Scheper exacerbati paradisum operariorum paucis annis post relinquerent, dominus Borchert mansit artificem Sophiam Matveieva in matrimonium ducturus. Quae filiam Ericam anno 1935 peperit. Anno 1938 iussu superiorum Borchert civis Sovieticus fieri debuit.

Velut in aliis operariis peregrinis non redeuntibus mox in domino Borchert suspicio generalis subesse coepit. Die 25 Decembris 1941 miles constructorius factus est in legione structoria nr 871, quae ergasteria aluminii magna apud Kamensk-Uralski erigeret. Die 18 Novembris 1942 captus est propter - ut aiebant - occultam eversionem vastationemque consulto factam. Insuper ei imputata sunt a Russis desertio et transfugium in exercitum Germanicum. Die 15 Ianuarii 1944 accusatus est in perduellione, in crimine laesae maiestatis et in praesentia ad occultos conventus. Haud ante annum 1962 eius honores publice restituti sunt.

Honores

Anno 2009 in eius habitaculo in via Friedrich-Engels-Straße nr 67 Erfordiae affixa est tabula memorialis.

Expositiones aliae

1929: expositio internationalis praetitulata "Homo pulcher in arte moderna", Darmstadii
1930: expositio in Museo Anger, Erfordiae
1964: expositio de Borchert in Domu centrali architectorum, Moscuae
2007: congressus internationalis Catharinopolitanus de domibus Bauhaus in Russia
2009: opera tria monstrantur Moscuae in expositione A Dürer usque ad Paulum Klee
2012/13: expositio de Borchert in Museo Puškin in Russiae capite

Bibliographia

Tractatio in ephemeride Thüringer Allgemeine: "Kunst-Laufbahn begann in Erfurt", 3 Septembris 2009
Erich Borchert. 1907−1944. Catalogus expositionis, Moscuae, 2012 (Russice)

Nexus externi

Borchert in elencho persecutorum artificum Sovieticorum
Erich Borchert: The artist who escaped from the prison of time, The Voice of Russia, 11.12.2012 (Anglice)

Vicimedia Communia plura habent quae ad Henricum Borchert spectant.