Gobryas (pater Mardonii)

Gobryas (Graeceː ΓοΒρύας; Persiceː Gaubaruva, Accadiceː Gubarru) fuit unus e septem nobilibus Persis qui anno 522 a.C.n. magum Gaumata everterunt qui sub nomine supposito fratris Cambysis Bardya regnum usurpaverat. Ita effecit ut Darius regnaret.

Trilinguis inscriptio (Persice, Elamitice, Accadice) Behistuni in Irania saxo incisa. Darius Gobryan inter socios suos nominatː prima figura ex laeva parte Gobryas esse creditur quia hastam regis fert.

De familiaribus necessitudinibus

Tempore quo magum Gaumata regno amoverunt Gobryas Darii socer iam erat, qui ex filia Gobryae tres liberos genuit, e quibus maximus natu fuit Artobarzanes. Dario iam regnante Gobryas unam e sororibus regis uxorem duxit e qua Mardonium genuit illum qui Plataeensi proelio Persarum exercitum ducebat. Ita dupliciter cum Dario conexus erat.

De bellis

Primo regni anno multae seditiones ortae sunt (undeviginti proelia uno anno commississe sese iactabat Darius). Secundo anno Gobryas exercitum duxit adversus tertiam seditionem Elamitarum et eorum ducem Atamaitam (Atta-hamiti-Inšušinak). Postquam eos vicit satrapes illius regionis factus est. Circa 513 a.C.n. Darium in Scythiam ultra Danubium secutus est et consiliorum eius sapientia a scriptore Graeco Herodoto laudatur. Nam regi suadebat ut quam celerrime ad Danubium rediret et propositam militiam omitteret nec in regione deserta errare pergeret (quae tamen verba sunt fortasse fabulosa).

De dignitate

E tabellis fictilibus Persepolitanis compertum habemus dignitatem Gobryae in imperio Persarum circa 498 a.C.n. secundam fuisse post regem et eius filium. Arštibara - hoc est hastifer - regis Darii erat in cuius sepulchro ad Persepolim et in texto memoratur et a sculptore expressus est. Radušdukda, filiam Hystaspis et sororem Darii I, uxorem duxerat e qua genuit Mardonium qui Persas adversus Graecos ducebat et ad Plataeas victus anno 479 a.C.n. periit. Ille Mardonius filiam Darii Artozostren uxorem duxerat.

Fontes

• Inscriptio Behistunia IV.68 et V.71 Textus Anglice versus apud Livium.org
• Herodotus, Thalia 70-87; Melpomene 130-135.

Plura legere si cupis

• Heinz Luschey, Studien zu dem Darius-Relief von Bisutum, Archaeologische Mitteilungen aus Iran, 1968ː 63–94.

Nexus externi

• Gobryas apud Livium.org
• Gobryas in Encyclopaedia Iranica