Alae pullinae Buffalonenses
Alae pullinae Buffalonenses,[1][2] Anglice Buffalo wings, Buffalo in urbe anno 1964 primum inventae, sunt ferculum quod in cibum promptum saepissime in Civitatibus Foederatis et Canada proponitur.
Alas Buffalonenses anno 1964 apud tabernam Anchor Bar media urbe frequentatam a coqua Teressa Bellissimo inventas esse, aut a marito Franco aut a filio Dominico suasa, fere omnes confitentur, etiamsi fontes scripti huius rei carent, etiamsi Ioannes Young, caupo alibi in eadem urbe versatus, se iam paulo antea alas pullinas iure pungenti intulisse dixisset.[3] Ferculum a principio minime dispendiosum erat, ala pullina eo usque a ganeonibus Americanis spreta, a coquis ibi ad iusculum pullinum conficiendum adhibita.[4] Popinae urbis Buffalonis regionisque circumiacentis citius, alibi in Civitatibus Foederatis lentius alas Buffalonenses inferre incipiebant, sed catenae popinarum nationales ab anno 1975 proponere susceperunt, videlicet Wings N'Curls eo anno, Hooters anno 1984, Domino's 1994, Buffalo Wild Wings et Pizza Hut ab anno 1995. Municipium Buffalonense diem 29 Iulii 1977 "diem alarum pullinarum" proclamavit inventoremque Francum Bellisimo (Teressa oblita) celebravit. Apud Anchor Bar etiam hodie alae pullinae crebrissime urbanis peregrinisque inferuntur iusque ad temperationem alarum coctarum lagenis immissum venditatur,[5] nomine Original Anchor Bar buffalo wing sauce. Quod ius omnium talium optimum esse aestimatur.[6]
Alae pullinae in tres partes articulantur: pars minima cuiusque alae deiicitur. Alae ita articulatae, farina sale pipere pulvere capsici involutae, oleo calido immersae, friguntur. Ius e butyro fuso, liquamine capsicorum, liquamine lycopersicorum, pulvere capsici, pulvere cayennae commixtis paratur. Alae coctae, oleo exemptae, hoc iure induuntur et inferuntur cum apio hortensi cui embamma Roquefortense[7] apponi solet. Ad paropsidem saepe bacula carotarum adduntur, nonnumquam embamma bubulcarium(en) loco Roquefortensis apponitur.[8]
Notae
recensere- ↑ Haec appellatio a Vicipaediano e lingua indigena in sermonem Latinum conversa est. Extra Vicipaediam huius locutionis testificatio vix inveniri potest.
- ↑ Iam Malaice Kepak ayam Buffalo, Francogallice Ailes de poulet à la mode de Buffalo
- ↑ Trillin (1980)
- ↑ Brownell (2014)
- ↑ Harmon (n.d.)
- ↑ Zimmer (2018)
- ↑ Gary Allen, "The History of Roquefort French Dressing" apud The Rambling Epicure
- ↑ Allrecipes
Bibliographia
recensere- Claire Brownell, "Why the once worthless chicken wing is now worth billions" in Financial Post (16 Augusti 2014)
- Craig Claiborne, Pierre Franey, "Winging it in Buffalo" in New York Times (30 Augusti 1981)
- Calvin Trillin, "An attempt to compile a short history of the Buffalo chicken wing" in New Yorker (25 Augusti 1980) pp. 82-87
- Denver Nicks, Hot Sauce Nation (Chicagi: Chicago Review Press, 2017) pp. 116-120
Nexus externi
recensere- John E. Harmon, "On the Wings of a Buffalo or "Mother Teressa's Wings"" apud Atlas of Popular Culture in the Northeastern United States
- Erin Zimmer, "Buffalo Wing Sauce: Taste Test" (10 Augusti 2018) apud Serious Eats
- "Restaurant-Style Buffalo Chicken Wings" apud Allrecipes