Samuel Danforth

Samuel Danforth (1626–1674) fuit minister Puritanus, praedicator, poeta, astronomus, ac socius Reverendi Ioannis Eliot oppidi Roxberiae Massachusettae, apostolus Indorum appellati.

Pagina titularis ephemeridis anni 1647.

Samuel Danforth Framlinghamiae in Suffolcia die 17 Octobris 1626 natus est, sextus ex septem liberis Nicholai Danforth (1589–1639) et Elizabethae Symmes Danforth (c.1596–1629). Sex liberi superantes—Elizabetha (1619–1673), Anna (1622–1704), Thomas (1623–1699), Lydia (1625–1686), Samuel, Ionathan (1628–1712)—cum patre Massachusettam anno 1634 migraverunt. Patre autem anno 1639 mortuo, Samuel cum Thoma Shepard, pastore templi Cantabrigiae, commoratus est, et deinde in Collegio Harvardiano matriculavit, ubi anno 1643 studia ad finem perduxit, et tutor usque ad 1650 mansit. Inter sua studia fuerunt astronomia, et hoc tempore tres ephemerides protulit (annorum 1647, 1648, et 1649), quae sunt prima generis exempla Americana exstantia. Quarta (anni 1646) ei tribuitur, sed singulum exemplar pagina titulari aliisque paginis et ergo auctoris nomen caret. Hae ephemerides sua poemata (quorum nonnulla aenigmata vel quaestiones verborum sunt) ac prima exempla versuum saecularium in Nova Anglia prolatorum offerunt. Praeterea breves eventuum magni momenti in historia Novae Angliae temporum ordines, cum tabulis caelestibus, tabulis quae ad aestum pertinuerunt, calendaria, et dies iudicii continuerunt. Anno 1650, pastor Roxberiae factus est, ubi Reverendus Ioannes Eliot fuit senex docens, et die 24 Septembris 1650 ordinatus est. Anno 1651 Mariam Wilson (1633–1713), filiam Reverendi Ioannis Wilson Bostoniae duxit, quae ei duodecim liberos peperit. Mortuus est die 19 Novembris 1674.

Opera

• MDCXLVII: An Almanack for the Year of Our Lord 1647. Cantabrigiae Massachusettae, 1647.
• MDCXLVIII: An Almanack for the Year of Our Lord 1648. Cantabrigiae Massachusettae, 1648.
• MDCXLIX: An Almanack for the Year of Our Lord 1649. Cantabrigiae Massachusettae, 1649.
• [Catechismus Roxberiensis]. Cantabrigiae Massachusettae, 1650/51(?).
• An Astronomical Description of the Late Comet, or Blazing Star, as it appeared in New-England in the 9th, 10th, 11th, and in the Beginning of the 12th Moneth, 1664. Together with a Brief Theological Explanation Thereof. Cantabrigiae Massachusettae, 1665; Londinii, 1666.
• A Brief Recognition of New-Englands Errand into the Wilderness; Made in the Audience of the General Assembly of the Massachusetts Colony, at Boston in N.E. on the 11th of the third Moneth, 1670, being the day of Election there. Cantabrigiae Massachusettae, 1671.
• The Cry of Sodom Enquired Into; Upon Occasion of the Arraignment and Condemnation of BENJAMIN GOAD, for his Prodigious Villany. Cantabrigiae Massachusettae, 1674.
• "A Letter out of Grief," in Cottoni Matheri Magnalia Christi Americana. Londinii, 1702.
• Samuel Danforth's Almanack Poems and Chronological Tables 1647–1649, digitalcommons.unl.edu

Bibliographia

• Bercovitch, Sacvan. 1978 The American Jeremiad. Madisoniae Visconsiniae: University of Wisconsin Press. ISBN 0299073505.
• Miller, Perry. 1956. Errand into the Wilderness. Cantabrigiae: Harvard University Press.