Maria Larroche

Maria vulgo Marie Larroche (nata die 18 Martii 1845 Divoduri Mediomatricorum, mortua die 27 Maii 1940 Segoduni) praesertim ad vitam caecorum emendandam laboravit; Francogalla et esperantista fuit.

Vita

Idioma Zamenhofianum Claudio Colas docente edidicerat, cui in praeconiis faciendis auxiliabatur. Namque erat in votum ut catholici de bono atque fertili usu Linguae internationali scirent. Quinquies Congressui catholico parando operam dabat et folia "Espero Katolika" nonnullos annos moderabatur; tunc praeses vicaria Unionis Internationalis Esperantistarum Catholicorum creata est, cuius sodales eam lepide aviam unionis nominabant.

Cum ex anno 1933 praeses atque presbyter Ioannes Font i Giralt aegrotus officia tam unionis ducendae quam foliorum edendorum implere non iam posset, secretarius generalis Paulus Antonius Schendeler signum vitae petivit. Responso neglecto sodales Silvae Ducis congregati litteras Ioanni dederunt cum petitione, ut Mariae Larroche vicariae ductionem translaturus esset. Responso iterum absente Maria usque congressum Romanum anni 1935 ad tempus praesidium duxit. Revera unum annum praesidis munere fungebatur, quo conventum generalem anni 1935 indixit. Maria ipsa, aetate valde provecta, iter fecit Lutetia Romam.

Etiam aerarium unionis ad tempus curabat. Anno 1940 bello saeviente Lutetia ei deserenda fuit.

Nexus externi

Vita in paginis unionis IKUE