Brief recit & succincte narration de la navigation faicte es ysles de Canada, Hochlage & Saguenay & autres (Lutetiae, 1545), qua editione narratio secundae navigationis divulgata est
Brief recit & succincte narration de la navigation faicte es ysles de Canada, Hochlage & Saguenay & autres (Lutetiae, 1545), qua editione narratio secundae navigationis divulgata est

Iacobus Quarterius seu vulgo Jacques Cartier (Maclovii in Britannia Minore natus anno 1491; ibidem die 1 Septembris 1557 mortuus) flumen Canadense hodie Sancti Laurentii dictum pro rege Francico exploravit tribus navigationibus, annis 1534, 1535 et 1541 inceptis. Nomen Canadae ille primus adsignavit.

Iacobum Quarterium inter dies 7 Iunii 1491 et 23 Decembris eiusdem anni natum esse constat. De ortu et familia pauca sciuntur. Filius fuit Jamet Cartier et Geffeline seu Geseline Jansart. Libri manualis Les Loables Coustumes du pays & duche de Bretaigne ... avec les coustumes de la mer (1514) possessor ab anno 1518, crebriter testis et iuratus apud curiam Macloviensem aderat. Uxorem anno 1520 Mariam Catharinam duxit, quae filia fuit equitis Iacobi des Granches, eiusdem urbis constabuli, et Franciscae Du Mast. Iam anno matrimonii sui titulum meruerat "magistri piloti iuxta portum S. Maclovii". E fonte antiquiore nihil de rebus expeditioni suae antecedentibus legitur nisi quod Quarterius anno 1533 tanquam explorator terrarum occidentalium seipsum proposuerit apud Philippum domino de Brion, regis Francici Francisci I admiralem, qui statim regis consensum obtinuerit