Rodericus de Arriaga
Rodericus vulgo Rodrigo de Arriaga fuit theologus, socius Societatis Iesu, et philosophus Hispanicus.
Vita recensere
Rodericus de Arriaga natus est anno 1592 die 17 Ianuarii. Societatem Iesu ingressus est anno 1606 die 17 Septembris, et solida vitae religiosae fundamenta tiro iecit. Philosophiam magno plausu Vallisoleti docuit, et theologiam Salmanticae exorsus, cum Praepositus Generalis Mutius Vitellescus litteris significasset gratum sibi, et ex Dei gloria maiore fore, si qui ex Patribus Hispanis, altioribus studiis suppetias ferre vellent Provinciae Bohemiae, recenter ab Austriaca separatae, et paulo antea hostiliter devastatae, non obstantibus itineris longi difficultatibus, Rodericus vota quattuor tum professus, prompte se ad illud obtulit, annoque 1624 se in viam dedit.
Theologiam Scholasticam tredecim annis Pragae in Collegio Sancti Clementis professus est; duodecim annis cancellarius illius universitatis fuit, et viginti generalis studiorum praefecti munere functus est, magna doctrina, ac nominis claritudine, et Sacrae Theologiae laurea doctorali insignitus. Ter electus est a Provincia Bohemiae, ut Romam adiret ad Congregationes generales octavam, decimam, et undecimam; et quamvis ibi saepius invitatus a Patribus Hispanis ad reditum in Hispaniam, et natale solum, semper constanter abnuit. Sed non minor ei laus a virtutibus religiosis, quam a doctrina fuit. Orationis fuit apprime amans, et complures per diem horas ei sancte impendit, etiam in itineribus in quibus antecedens saepe comites, parandi praetextu hospitii in hoc ubi angulum aptum reperisset, provolutus in genua complures horas Deo vacabat, domi vero nunquam fere visus est aliud agere, quam vel studere, vel orare. Paupertatis sanctae quam fuerit studiosus, monstrat eius tenuissima supellex, unicam namque interulam per annos viginti sex saepius resarcitam circumtulit; pectorali gossipino ex Hispania discedens annis amplius quinquaginta usus est. Lectiones in scholis praelegendas, et annotationes alias, ut plurimum in rudi aut reiectanea charta describebat. Nihil vel minimum dare, aut accipere sine expressa superiorum licentia praesumebat.
In maxima aestimatione, et pretio cum esset ob eminentem doctrinam apud duos summos pontifices, Urbanum VIII, et Innocentium X, apud Ferdinandum III Imperatorem, et apud omnes Europae universitates, ipse tamen humiliter de se sentiebat, et cum domesticis, scholasticis, et adiutoribus temporalibus, quasi unus ex ipsis recreationem instituebat, et rudioris sortis confessiones libenter excipiebat, His et aliis virtutibus ornatus doctissimus pater, a Deo ad laborum praemia evocatus est Pragae in Collegio ad Sanctum Clementem, die 7 Iunii 1667, vir omnium iudicio ob subtilitatem ingenii, doctrinae praestantiam, et virtutis commendationem inter prima societatis lumina merito collocandus.
Opera recensere
Edidit:
- Cursum Philosophicum, Antverpiae, ex Officina Plantiniana Moreti 1632, in-folio. Auctum, et recusum, Lugduni 1669, in folio.
- Cursum Theologicum Tomis VIII distinctum, quorum
- Est de Deo uno, et Trino, Antverpiae, apud Balthafarem Moretum 1643, in-folio.
- De Angelis, Opere sex dierum, et ultimo fine hominis, Ibidem, iisdem typis, et anno in-fol.
- De Actibus humanis, Passionibus animae, Vitiis, et Peccatis, Ibidem 1644, in-folio.
- De Legibus, Divina gratia Iustificatione, et Merito, Ibidem eodem anno, et forma.
- De Virtutibus Theologicis, Fide, Spe, Charitate, et IV Cardinalibus, Ibidem 1649, in-folio.
- De Incarnatione Verbi Divini, Ibidem 1650, in-folio.
- De Sacramentis in genere, Baptismo Confirmatione et Eucharistia, Ibidem 1655, in-folio.
- De Sacramentis Poenitentiae, Extremae Unctionis, et Ordinis, Ibidem 1655, in-folio.
Nexus externi recensere
|
Lexica biographica: Treccani • Deutsche Biographie |